Порошенко Россияни Донбассни аннекция қилишга тайёрланишда айблади

Украинанинг амалдаги президенти Петро Порошенко Россия президенти Владимир Путиннинг «Донецк Халқ республикаси» ва «Луганск халқ республикаси» ҳудудида яшовчилар учун паспорт беришни соддалаштириш тўғрисидаги фармонини қоралади.

Порошенко бу фармонни Россиянинг Украина ички ишларига «навбатдаги марта мислсиз аралашуви» деб атаган.

«Гап Кремль бизнинг давлатимизга яна бир бор агрессия қадами — Украинанинг Донбассини аннекция қилиш ёки Украинада Россиянинг анклавини тузиш ҳақида кетмоқда», — деган Порошенко фейсбукдаги видеомурожаатида.

Ўз навбатида Владимир Зеленскийнинг штабидагилар ҳам Россия бу орқали «оккупант-давлат» эканини тан олгани ҳақида баёнот беришган. «Афсуски, бу фармон бизни мақсадга — ўт очишни тўхтатишга яқинлаштирмайди», — дея қайд этилади Зеленский жамоаси баёнотида. Сайланган президентнинг штабидагилар президент «босиб олинган ҳудудлардаги» Украина фуқароларига ёрдам бериши ҳақида гапирган.

Порошенко ҳам, Зеленский ҳам Россияга қарши санкцияларни кучайтришни сўрашган.

Владимир Путин Донбасс аҳолиси учун РФ паспорти олишни соддалаштиришни гуманитар характерда деб айтган. «Бизда Украинанинг янги ҳукумати учун муаммо яратиш нияти йўқ. Аммо вазият шундайки, у ердаги одамлар фуқаролик ҳуқуқларини йўқотишган», — деган Россия президенти.