Мексикадаги авиаҳалокатда боксчи Саул Альварес мухлиси бўлган 14 киши ҳалок бўлди

Фото: CC BY 2.0 / Dave Montiverdi / Private Challenger 601

Мексикада Bombardier Challenger хусусий самолёти ҳалокатга учраши оқибатида 14 киши ҳалок бўлди. Қутқарувчилар самолёт бўлакларини топишган ва 14 киши ҳалок бўлганини тасдиқлашган. Бу ҳақда Reforma нашри хабар берди.

Самолёт Мексиканинг Коауила штатидаги Монклова муниципалитети яқинида топилган. 11 йўловчи ва экипажнинг 3 аъзоси ҳалокат қурбонлари бўлган.

Дастлабки маълумотларга кўра, самолёт момақалдироққа тушиб қолган ва учувчи уни фавқулодда қўндиришга ҳаракат қилган.

Йўловчилар АҚШнинг Лас-Вегасидан мексикалик боксчи Саул Альварес иштирокида 5 майга ўтар кечаси ўтган жангдан кейин Нуэво-Леон штатидаги Монтеррей шаҳрига қайтишаётган бўлган.