Мундиал таништируви. А гуруҳи ҳақида нималарни билиш керак?
|19:37 / 11.06.202610 52815 мин
Тўрт қитъадан тўрт жамоа.
Фото: ФИФА расмий сайтиФото: ФИФА расмий сайти
Бугун океан ортида футбол бўйича жаҳон чемпионати ўйинлари бошланади. 48 жамоа иштирокидаги турнирни мезбонлардан бири бўлган Мексика ва 16 йил олдинги мундиалга мезбонлик қилган ЖАР миллий жамоалари ўртасидаги учрашув очиб беради. Қуйида А гуруҳидан ўрин олган жамоалар ҳақида асосий маълумотлар ва уларнинг имкониятлари ҳақида.
А гуруҳи тақвими
1-тур
12 июнга ўтар кечаси, соат 00:00 (Тошкент вақти)
Мексика – ЖАР
12 июн, соат 07:00
Жанубий Корея – Чехия
2-тур
18 июн, соат 19:00
Чехия – ЖАР
19 июн, соат 06:00
Мексика – Жанубий Корея
3-тур
25 июн, соат 06:00
Чехия – Мексика
25 июн, соат 06:00
ЖАР – Жанубий Корея
Мексика
Мураббий
Жамоа охирги Америка кубогида гуруҳдан чиқа олмагач, 2024 йил июлида бош мураббий Ҳайме Лосано ўрнини Ҳавиер Агирре эгаллади – бу унинг учун жамоа бошқарувига учинчи бор келиши бўлди. У олдин ҳам икки марта мексикаликларни жаҳон чемпионатларига олиб борган – 2002 ва 2010 йилларда. Иккала ҳолатда ҳам жамоа плей-оффга чиққан, аммо 1/8 финалдан ортга қайтган.
Ушбу мутахассис Мексика билан икки марта КОНКАКАФ Олтин кубогини қўлга киритган, футболчилик вақтида эса 1986 йилги жаҳон чемпионатида жамоанинг асосий футболчиси бўлган – аммо чорак финалда Германияга қарши ўйинда қизил карточка олган, якунда мексикаликлар пеналтилар сериясида ютқазишган.
Юлдузлар
Жамоатчиликнинг эътибори биринчи навбатда 40 ёшли Гилермо Очоага қаратилмоқда. Ушбу дарвозабон учун бу сафарги мундиал олтинчиси бўлади – бу кўрсаткич бўйича у Месси ва Роналду билан бир қаторда мутлақ рекорд эгаси бўлади. Шу билан бирга, у майдонга тушиши даргумон. У 2024 йил ноябридан буён миллий жамоа дарвозасини қўриқламаяпти, 2026 йилда мексикаликлар дарвозасини «Гвадалаҳара» посбони Раул Ранҳел ҳеч кимга бермаяпти.
Мавзуга оид
Жамоанинг яна бир фахрий футболчиси, шу кунларда «Фулҳэм»дан «Вулверҳэмптон»га қайтган Раул Хименес ҳам кўпчилик мухлисларга таниш. Ушбу ҳужумчи яна икки гол уриш орқали Мексика миллий жамоаси тўпурарлари рўйхатида иккинчи ўринга чиқиб олиши мумкин, биринчи ўриндаги Чичаритога етиш учун эса саккизта гол қолган.
Реал мақсад
Мексикаликлар ўзининг энг яхши натижасини такрорлаб, чоракфиналгача етиб бориш учун имкониятга эга. Катта эҳтимол билан, бундай натижа – орзуларнинг энг юқори чегараси, бундан кўпроқ нарсага умид қилиш хаёлпарастлик бўларди. Албатта, жаҳон чемпионати мезбонлари ўз имкониятлари чегарасидан ташқарига чиққан ҳолатлар ҳам бўлган, аммо бунақасини олдиндан прогноз қилиб бўлмайди.
74 ёшли Ҳюго Брос ЖЧ тарихидаги энг кекса ёшли мураббий бўлиши мумкин эди, аммо Дик Адвокат Кюрасао миллий жамоасига қайтиши ва қуйида номи келадиган яна бир миллий жамоа бош мураббийи туфайли белгиялик ушбу мутахассис учинчи ўринда жойлашган. У фаолиятини қарийб 40 йил муқаддам, 1988 йилда бошлаган, 2024 йилда илк катта ютуғига эришган – Африка миллатлар кубогида бронза медаллар қўлга киритилган. Бу ЖАР учун XXI асрда илк бор қитъа турнирида шоҳсупага кўтарилиш бўлганди.
Дарвоқе, Брос ҳам Агирре каби 1986 йилги жаҳон чемпионатида футболчи сифатида иштирок этган, ўшанда биринчи тур доирасида Мексика ва ЖАР ўйинида бир-бирига қарши ўйнашган.
Юлдузлар
Бу жамоада ҳам асосий юлдуз дарвозабон. Ронуэн Уилямс болалигида «Тоттенҳэм» академиясида таҳсил олган бўлса-да, бутун профессионал карьерасини ўз ватанида ўтказди. Аммо шу ерда ўйнаб, машҳурликка эриша олди ва 2024 йилда Лев Яшин мукофоти учун номзод бўлди. Африкалик дарвозабон ўшанда Африка кубогида ёрқин ўйин кўрсатган, чоракфиналдаги ўйиндан кейинги пеналтилар сериясида рақибларнинг тўртта зарбасини қайтарган. Бунинг эвазига у жаҳоннинг энг яхши дарвозабонини аниқлаш учун овоз бериш жараёнида Грегор Кобелни ортда қолдириб, тўққизинчи ўринни эгаллаганди.
Жамоанинг олдинги чизиғида эса барча умид «Бёрнли» аъзоси бўлган 25 ёшли Лайл Фостердан. АПЛдаги энг кам маош олувчи футболчи (ҳафтасига 887 евро) ўтган мавсумда АПЛда Габи Жезус, Тэмми Абраҳам, Федерико Киеза, Эстевао, Амад Диалло, Габриэл Мартинелли ва Бернарду Силва каби юлдуз футболчилардан кўпроқ гол (3+2) урди. Балки у жаҳон чемпионатида тўпурарлик қобилиятини намойиш этиш орқали кучлироқ клубга ва яхшироқ маошга эга бўлар?
Реал мақсад
Жанубий африкаликлар жамоаси ҳар бир очкодан хурсанд бўлиши тайин. Агар Брос ЖАРни тарихда илк бор жаҳон чемпионати плей-офф босқичига олиб чиқадиган бўлса, бу мамлакатда катта воқеага айланади. Ва эндиликда гуруҳдан чиқиш осонроқ бўлиб қолгани муҳим эмас. Гуруҳда учинчи ўринни эгаллаш ва 1/16 финалда муносиб иштирок этиб, ортга қайтиш – жамоа мухлисларини хафа қилмайдиган натижа бўлади.
Жанубий кореяликлар миллий жамоаси ўз уйида ўтказилган 2002 йилги жаҳон чемпионатида сенсация кўрсатиб, яримфиналга қадар етиб борганида ушбу жамоа етакчиси тажрибали ҳимоячи Хон Мен Бо эди. У ўша турнир якунида Кан ва Роналдо билан бирга шоҳсупага кўтарилиб, «Бронза тўп»ни қабул қилиб олганди. Унинг миллий жамоа сафида ўтказилган ўйинлар сони бўйича рекорди яқин вақтларгача сақланиб турди ва фақат Сон Ҳеунг Мин бу натижани янгилай олди. Умуман олганда, у маҳаллий миқёсдаги афсона ҳисобланади.
Футболчилик фаолиятини якунлагач, Бо мураббийлик фаолиятини бошлаб, 2014 йилда миллий жамоани Бразилия яшил майдонларида ўтган мундиалга олиб борди, аммо муваффақиятсизликка учраб, гуруҳда охирги ўринни эгаллади. 12 йил ўтиб у навбатдаги уринишни амалга ошириб кўради.
Юлдузлар
Осиёнинг барча даврлардаги энг яхши футболчиси, АПЛ «Олтин бутса»си ва Пушкаш мукофоти соҳиби, миллий жамоа тарихидаги ўйинлар сони бўйича биринчи, голлар сони бўйича иккинчи, «Тоттенҳэм» тарихидаги энг яхши тўртинчи тўпурар, жуда олийжаноб ва яхши хулқли футболчи – умуман, Сон Ҳеунг Минга таъриф беришни узоқ давом эттириш мумкин. У тўлақонли жаҳон миқёсидаги юлдуз ҳисобланади.
Кореяликлар сардори жаҳон чемпионатида тўртинчи бор иштирок этади ва фақат бир марта плей-оффда ўйнаган. Кореяликлар сафида ундан ташқари «Бавария» ҳимоячиси Ким Мин Жэ ва «ПСЖ» яримҳимоячиси Ли Кан Ин каби юлдуз футболчилар ҳам океанортига етиб келган.
Реал мақсад
Жамоанинг 2026 йилдаги натижалари хавотир уйғотади – Жанубий Корея Кот-д'Ивуарга ҳам, Австрияга ҳам ўртоқлик учрашувларида ютқазди ва бу ўйинларда бирорта гол ура олмади. Аммо жамоадаги ижрочиларнинг маҳорати даражаси плей-оффга чиқиш ва бу босқичда камида битта ўйинда ғалаба қозониш учун етарли ҳисобланади. Жамоада турнирнинг энг яхши 16 жамоаси қаторига кириш учун имконият етарли.
Таркиб
Дарвозабонлар: Жо Ҳенг У («Улсан Ҳёндэ»), Ким Син Гю («Токио»), Сон Бом Гын («Чонбук Ҳёндэ Моторс»).
Ҳимоячилар: Ким Мин Жэ («Бавария»), Чо Ю Мин («Ал-Шаржа»), Ли Ҳан Бом («Мидтюлланн»), Ким Тҳэ Ҳёнг («Касима Антлерс»), Пак Жин Сеоб («Чжэцзян»), Ли Ки Ҳек («Канвон»), Ли Тэ Сок («Аустрия» Вена), Сол Ен У («Црвена Звезда»), Йенс Кастроп («Боруссия» Мёнҳенгладбаҳ), Ким Мунг Ҳванг («Тэчжон Ситизен»).
Яримҳимоячилар: Ян Ҳеунг Жунг («Селтик»), Пайк Сын Хо («Бирмингҳэм»), Ҳванг Ин Бём («Фейеноорд»), Ким Жинг Гю («Чонбук Ҳёндэ Моторс»), Пэ Жу Хо («Сток Сити»), Ом Жи Сун («Суонси»), Ҳванг Ҳи Чҳанг («Вулверҳэмптон»), Ли Донг Генг («Улсан»), Ли Жэ Сон («Майнц»), Ли Кан Ин («ПСЖ»).
Ҳужумчилар: О Хен Гю («Бешиктош»), Сон Ҳеунг Мин («Лос-Анжелес»), Жо Гю Сон («Мидтюлланн»).
Чехия
Мураббий
Ҳюго Брос жаҳон чемпионатидаги энг кекса мураббийлар рўйхатида иккинчи ҳам бўлишига йўл қўймаган мураббий – Мирослав Коубек сентябр ойида 75 ёшга тўлади. Уни ўтиш ўйинлари олдидан, 2025 йил декабрида жамоа бошқарувига тайинлашганди. Ундан олдинги мураббий Иван Гашек Фарер оролларидан учралган мағлубиятдан кейин истеъфога чиқарилганди, аммо жамоа гуруҳда иккинчи ўринни олиб, Америкадаги турнирга йўлланма учун курашни давом эттирди.
Коубек бошчилигида жамоа ўтиш босқичида Ирландия ва Дания тўсиғидан ўтди – икки ўйин тақдири ҳам пеналтилар сериясида ҳал бўлди. Мирославнинг фаолияти титуллар ва ёрқин вазиятларга бой эмас – у ўн йил муқаддам «Виктория» билан чемпионлик ва Суперкубокни қўлга киритган. Унинг ҳаётидаги энг яхши ҳиссиётлар олдинда турган бўлса ажаб эмас.
Юлдузлар
Чехия футболида анчадан буён Недвед ёки ҳеч бўлмаганда Росицки даражасидаги футболчилар чиқмаяпти, аммо ҳозирги авлодда ҳам номлар етарли. Бир неча йилдан буён жамоанинг асосий юлдузи Патрик Шик бўлиб турибди, ушбу ҳужумчи Евро-2020 турнирида энг яхши тўпурар бўлган, «Байер» тарихидаги тўпурарлар рўйхатида учинчи ўринда турибди. Ирландлар билан ўйинда айнан у пеналтидан ҳисобни тенглаштириб, камбэкни бошлаб берганди, саралашнинг асосий қисмида эса у рақиблар дарвозасини тўрт бор ишғол этганди.
Реал мақсад
Чехлар гуруҳ фаворити эмас, аммо гуруҳда охирги ўринда ҳам қолмаслиги керак. Кўп нарса биринчи турда Жанубий Корея билан ўйиндан кейин ойдинлашади. ЖЧ-2006 даги натижа такрорланиб, плей-оффга чиқа олмаслик ҳар қандай ҳолатда ҳам муваффақиятсизлик сифатида қабул қилинади. Жамоа камида 1/16 финалга чиқишни кўзлаган.
Албатта, мексикаликлар гуруҳда биринчи ўринни эгаллаши керак, бундай рақиблар билан бир гуруҳда мезбон жамоа учун бошқача мақсад қабул қилинмайди. ЖАР эса бу рақиблардан исталганига муаммолар туғдиришга қодир, аммо жамоанинг 1/16 финалга чиқиш имкониятлари анча паст. Авлодлар алмашинуви даврини бошдан кечираётган чехлар эса иккинчи ўринни Жанубий Кореядан олиб қўйиши қийин иш. Кореяликлар биринчи ўрин учун Мексика билан рақобатлашишини кутиш мумкин.
