Зеленскийга Порошенконинг курсиси ёқмади

Украинанинг янги президенти Владимир Зеленский ўзининг биринчи иш куни президент курсисининг ноқулайлигидан шикоят қилди. 

Зеленскийнинг иш ўрнида биринчи марта пайдо бўлиши ва аввал собиқ президент Пётр Порошенко эгаллаган курси борасидаги таассуротлари видеоси президент жамоаси томонидан эълон қилинди. Видеода янги президент аввал Порошенко ўтирган курси ёнига келиб, унга ўтириб, унинг “ноқулайлигидан” шикоят қилади ҳамда ўз номига билдирилган олқишларга “Нимага чапак чаляпсиз?”, деб сўрайди атрофидагилардан.

“Мен эса қачон кўчиб ўтишимизни ўйламоқдаман”, деб айтади Зеленский президент кабинетидаги стол атрофида йиғилганларга. 

Украина президенти маъмурияти айни вақтда 1939 йилда қурилгандан кейин Киев ҳарбий округи штаби, урушдан кейин эса Украина коммунистик партияси марказий қўмитаси эгаллаган бинода жойлашган. Ушбу бино 1992 йилда президент қароргоҳига айланган.  

Аввалроқ Зеленский Банк кўчасида жойлашган ушбу бинода ишлашни истамаётганини айтган. Унинг айтишича, президент маъмурияти ҳукумат мавзесида эмас, балки очиқ жойда ишлаши лозим. Бироқ у қаерга кўчиб ўтмоқчилигига аниқлик киритмаган.