Зеленский: Украина ўз қаҳрамонларини ўзи танлайди

Украина Конституцияси куни муносабати билан сўзлаган нутқида Зеленский мамлакат парламенти – Олий радага Украина Миллий қаҳрамонлар пантеонини ташкил этиш тўғрисида ташаббус киритганини маълум қилди.

Унинг сўзларига кўра, турли даврларда Украина учун курашган, мамлакатга илҳом берган барча қаҳрамонларнинг исмлари ушбу пантеонга киритилади ва давлат томонидан юксак эҳтиром билан абадий тарихга муҳрланади.

«Бизга қандай яшашни, қайси тилда гапиришни, кимни севишни, кимдан миннатдор бўлишни ва қайси қаҳрамонларни эъзозлашни ҳеч ким кўрсатмайди», — деди Зеленский.

Бу баёнот Украина ва Полша ўртасида юзага келган дипломатик можаро фонида айтилди. Можарога Зеленский Украина Қуролли кучларининг бир бўлинмасига «УПА қаҳрамонлари» номи берилгани ҳақидаги қарори сабаб бўлган.

Варшавада мазкур қарор кескин танқид қилинди. Полшада Украина қўзғолончилар армияси (УПА) биринчи навбатда Иккинчи жаҳон уруши йилларида содир бўлган Волин қирғинлари билан боғланади. Полша бу воқеаларни расман поляк халқига қарши геноцид сифатида тан олган.

Можаро ортидан Полша президенти Карол Навроцкий Зеленскийни мамлакатнинг олий давлат мукофоти — Оқ Бургут орденидан маҳрум қилди.

Зеленский бунга жавобан кинояли муносабат билдириб, ушбу орден Екатерина II, Бенито Муссолини ва Германиянинг собиқ канцлери Герҳард Шрёдердан қайтариб олинмаганини таъкидлади ҳамда Украина бу масала бўйича баҳслашмаслигини айтди.

Полша томони эса мукофотлар вафот этган шахслардан қайтариб олинмаслигини, шунингдек, Шрёдернинг Полша халқини ҳақорат қилувчи ҳаракатлар содир этмаганини билдирди.

Можаро ортидан Зеленскийнинг бир қатор ҳамфикрлари ҳам Полша давлат мукофотларини қайтарган. Ўз навбатида, Полшадаги айрим сиёсатчилар ҳам Украина давлат мукофотларини Киевга топширган. Улар орасида мамлакатнинг мухолифатдаги «Ҳуқуқ ва адолат» партияси раҳбари Ярослав Качинский ҳам бор.

Качинский Полша ҳукуматини Украинанинг Европа Иттифоқига қўшилиш бўйича музокараларини блоклашга чақирди. Financial Times нашрининг ёзишича, бу чақириқ 2027 йил октябрида бўлиб ўтадиган парламент сайловлари олдидан электорат қўллаб-қувватловини кучайтиришга қаратилган бўлиши мумкин.

Июн ойида ўтказилган сўровнома натижаларига кўра, полякларнинг 58,3 фоизи Зеленскийнинг полякларга муносабатини салбий баҳолаган. 30,1 фоиз респондент эса бунга қўшилмаган. Шу билан бирга, Навроцкийнинг Зеленскийни давлат мукофотидан маҳрум қилиш қарори Полша жамоатчилиги томонидан ижобий қабул қилинган ва президентнинг ишонч рейтинги июнь ойи охирида 54,8 фоизга етган.

Зеленский шунингдек, «Европа» ордени номли янги давлат мукофотини таъсис этишни ҳам таклиф қилди. Унинг таъкидлашича, Украина Европа хавфсизлиги учун курашаётгани боис бундай номдаги орденга муносиб.

Президентга кўра, ушбу орден Украина хавфсизлиги ва Европа келажагини ҳимоя қилишга ҳисса қўшган украиналиклар, шунингдек, Украинанинг Европа Иттифоқига интеграциясини қўллаб-қувватлаган хорижликларга ҳам берилади.

Айни пайтда Европа Иттифоқининг ўзида «Европа» ордени мавжуд эмас. Иттифоқ даражасида фақат 2025 йилда таъсис этилган Европа хизматлари ордени топширилади. Зеленский мазкур мукофотнинг илк соҳибларидан бири ҳисобланади.