Самарқанд вилоят ҳокими йил бошидан буён 10-марта сайёр қабул ўтказди ва бу галгиси 4,5 соат давом этди

Самарқанд вилоят ҳокими Эркинжон Турдимов Жомбой тумани марказида навбатдаги оммавий сайёр қабулни ўтказди. Тўрт ярим соат давом этган бу галги қабулда 223 нафар фуқаро турли масалаларда вилоят ҳокимига мурожаат қилди. 

Фуқаролар томонидан йўлларни таъмирлаш, МИБ ҳаракатсизлиги, ер ажратиш масалаларига оид мурожаатлар нисбатан кўпроқ билдирилди. Қабул давомида Давлат хизматлари агентлиги томонидан кўчма автобусда тезкор хизматлар ҳамда туман бандлик бўлими томонидан бўш иш ўринлари ярмаркаси ўтказилди. 50 га яқин мурожаатлар жойида ижобий ҳал қилинди. Вақт талаб этиладиган мурожаатларга 31 майга қадар бўлган муддат билан масъуллар бириктирилди.

Мазкур қабул вилоят ҳокимлиги томонидан жорий йил бошидан бери ўтказилаётган қабулларнинг ўнинчиси ҳисобланади. Жами ўтган сайёр қабулларда 2 358 нафар фуқародан жами 2 705 та мурожаат тушган бўлиб, шундан 1 412 таси ижобий ҳал этилган. Мурожаатларнинг 228 таси рад этилган, 710 тасига тушунтириш берилган бўлса, яна 355 та мурожаат ҳозир ҳам ўрганиш ва ҳал этиш жараёнида.

Вилоят ҳокими томонидан йил бошидан бери ўтказилган сайёр қабулларда 31 нафар раҳбар жавобгарликка тортилган.