Япония АҚШдан юздан ортиқ F-35 самолётини сотиб олишини тасдиқлади

Фото: mod.go.jp

Япония АҚШдан 105 дона бешинчи авлод F-35 жанговар самолётларини сотиб олади. Бу ҳақда Япония бош вазири АҚШ президенти Дональд Трамп билан Токиода бўлиб ўтган учрашув якунларига бағишланган матбуот анжуманида маълум қилди.

"Япония 2018 йилда Америка қуролларини сотиб олган энг йирик харидорлардан бири бўлди. Ҳозир эса 105 дона янги F-35 сотиб олишини билдирди", - деди Трамп.

F-35 - "стелс" технологияси қўлланилган ҳолда ишлаб чиқарилган ва ядровий қуролни таший олишга қодир самолёт ҳисобланади. Мазкур самолёт лойиҳасини яратишда АҚШ билан бирга саккиз давлат: Австралия, Буюк Британия, Дания, Италия, Канада, Нидерландия, Норвегия ва Туркия иштирок этган.

Япония мудофаа кучлари ҳозирда 13 дона ана шундай самолётга эга. Аввалроқ Япония АҚШдан юздан ортиқ F-35 самолёти сотиб олиши ҳақида хабарлар чиққанди.