Yaponiya AQShdan yuzdan ortiq F-35 samolyotini sotib olishini tasdiqladi

Yaponiya AQShdan 105 dona beshinchi avlod F-35 jangovar samolyotlarini sotib oladi. Bu haqda Yaponiya bosh vaziri AQSh prezidenti Donald Tramp bilan Tokioda bo‘lib o‘tgan uchrashuv yakunlariga bag‘ishlangan matbuot anjumanida ma'lum qildi.

"Yaponiya 2018 yilda Amerika qurollarini sotib olgan eng yirik xaridorlardan biri bo‘ldi. Hozir esa 105 dona yangi F-35 sotib olishini bildirdi", - dedi Tramp.

F-35 - "stels" texnologiyasi qo‘llanilgan holda ishlab chiqarilgan va yadroviy qurolni tashiy olishga qodir samolyot hisoblanadi. Mazkur samolyot loyihasini yaratishda AQSh bilan birga sakkiz davlat: Avstraliya, Buyuk Britaniya, Daniya, Italiya, Kanada, Niderlandiya, Norvegiya va Turkiya ishtirok etgan.

Yaponiya mudofaa kuchlari hozirda 13 dona ana shunday samolyotga ega. Avvalroq Yaponiya AQShdan yuzdan ortiq F-35 samolyoti sotib olishi haqida xabarlar chiqqandi.