Иссиқхонада парваришланаётган каннабислар фош этилди

Божхоначилар томонидан гиёҳвандлик воситаларининг ноқонуний айланмасига қарши самарали кураш олиб борилмоқда.

Жумладан, Бухоро вилояти божхона бошқармаси Контрабанда ва божхона қонунчилиги бузилишига қарши курашиш бўлими ҳамда ДХХ Бухоро вилояти бошқармаси ходимларининг ўзаро ҳамкорлигида яна бир оғуфурушнинг фаолиятига якун ясалди.

Фото: Давлат божхона қўмитаси ахборот хизмати

Ўтказилган тезкор тадбир давомида Вобкент туманида яшовчи фуқаро Т.И.нинг яшаш хонадони холислар иштирокида кўздан кечирилди. Натижада, унинг хонадонидаги иссиқхонада 11 туп каннабис парваришланаётганлиги ҳамда жами 3,30 грамм “Марихуана” гиёҳвандлик воситаларга ўхшаш моддаларни сақлаб келинаётганлиги аниқланди.

Бухоро вилоят Эксперт криминалистика марказининг тегишли хулосасида ҳам ашёвий далил сифатида олинган моддаларнинг гиёҳвандлик моддаси эканлиги ўз тасдиғини топди.

Ҳозирда мазкур ҳолат юзасидан божхона текширувлари давом эттирилмоқда.