Фарғона вилояти божхона бошқармасининг «Риштон» чегара божхона пости орқали қўшни давлатдан кириб келаётган фуқаронинг хатти-ҳаракатлари божхона ходимларида шубҳа уйғотган. Шундан сўнг у белгиланган тартибда шахсий кўрикдан ўтказилган.
Текширув давомида фуқаро ички кийимига яшириб олган, декларацияланмаган ва тегишли ҳужжатлари мавжуд бўлмаган 23 дона қадоқдаги жами 950 га яқин «Tawon Liar» номли дори воситасини божхона назоратидан яширинча олиб киришга урингани маълум бўлган.
Мутахассислар хулосасига кўра, мазкур дори воситаси таркибида гиёҳвандлик воситалари рўйхатига киритилган «тапентадол» моддаси мавжудлиги аниқланган.
Ҳозирда мазкур ҳолат юзасидан божхона органлари томонидан жиноят иши қўзғатилиб, тергов ҳаракатлари олиб борилмоқда.
