Андижонда олтинларни турли найранглар орқали олиб киришга уринган шахслар тўхтатиб қолинди

«Дўстлик» чегара божхона пости орқали Ўзбекистонга кириб келаётган икки нафар аёлнинг юклари божхона назоратидан ўтказилди. Улардан бирининг киприк бўёғи (туш) идиши ичига уч дона қуйма олтин яширинча жойлангани аниқланди.

Унинг ҳамроҳи эса олтин бўлакларини атир идиши ҳамда ручка ичига жойлаштирган ҳолда олиб ўтишга уринган.

Шунингдек, ушбу пост орқали ҳаракатланган яна бир фуқаро шахсий кўрикдан ўтказилганида заргарлик буюмларини дўпписининг ичига жойлаб, олиб ўтмоқчи бўлгани маълум бўлди.

Мазкур ҳолатлар юзасидан суриштирув ҳаракатлари олиб борилмоқда.

Қонунчиликка кўра, жисмоний шахслар томонидан шахсий эҳтиёжлари учун нотижорат мақсадларда республикага олиб кириладиган товарларнинг божсиз олиб кириш нормаси автомобил ва пиёда ўтказиш пунктлари орқали 300 АҚШ доллари миқдорида белгиланган. Мазкур талаблар заргарлик буюмларига ҳам татбиқ этилади. Бунда буюмларнинг тайёр заргарлик маҳсулоти бўлиши ҳамда нотижорат мақсадларда олиб кирилиши муҳим аҳамият касб этади.