Ўқувчилар ўртасидаги фан олимпиадасининг республика босқичи бўлиб ўтмоқда

Академик лицейлар, касб-ҳунар коллежлари ва умумтаълим мактаблари ўқувчиларининг умумтаълим фанлари бўйича республика олимпиадасининг IV босқичи 8-11 июнь кунлари Тошкент қурилиш ва миллий ҳунармандчилик касб-ҳунар коллежи биносида ўтказилади, деб ёзади Халқ таълими вазирлиги матбуот хизмати.

Қайд этилишича, ота-оналарга олимпиада жараёнларини кузатув камералари орқали тўғридан-тўғри намойиш этиш учун олимпиада ўтаётган бинога яқин бўлган Олмазор туманидаги 224-мактабнинг спорт залида катта экран ўрнатилди ва жараёнларни кузатиши учун қулай шарт-шароитлар яратилди.

Бундан ташқари, олимпиада жараёнларининг шаффофлиги таъминлаш мақсадида ҳар бир хонага турли ракурсда намойиш этадиган кузатув камералари ўрнатилди.

Фан олимпиадасининг республика босқичи 18 та фан бўйича ўтказилмоқда ва мазкур фанларнинг ҳар биридан 3 нафардан ғолиб ўқувчилар аниқланади ҳамда уларга тегишли фан йўналишида олий ўқув юртига киришда имтёзлар берилади.

Эслатиб ўтамиз, умумтаълим фанлари бўйича республика олимпиадасининг 3-босқичи мактаб ўқувчилари учун алоҳида, академик лицейлар ва касб-ҳунар коллежларида таҳсил олаётган ёшлар учун алоҳида ўтказилди.

Жумладан, умумий ўрта таълим мактабларининг 11-синф ўқувчилари ўртасидаги фан олимпиадалари 23-27 март кунлари ўтказилиб, унда жами 20 649 нафар ўқувчи иштирок этди. Шунингдек, академик лицейлар ва касб-ҳунар коллежларининг 2- ва 3-босқичида таҳсил олаётган ўқувчилар учун 2-6 апрель кунлари ўтказилди ва унда 5280 нафар ўқувчи қатнашди.

Учинчи босқич натижаларига кўра, жами 1059 нафар (612 нафар умумтаълим мактабларидан, 447 нафар академик лицей ва касб-ҳунар коллежлардан) ўқувчи олимпиаданинг республика босқичида иштирок этиш учун йўлланмани қўлга киритди.