![](https://storage.kun.uz/source/4/l834lj_eHNpC8utwn2MagvmoNp65bcD4.jpg)
АҚШнинг Афғонистон бўйича махсус вакили Залмай Халилзод “Толибон” ҳаракати билан бўлиб ўтган музокараларнинг охирги раундини ўта сермаҳсул деб баҳолади. У бу ҳақда ўзининг Twitter саҳифасида маълум қилди.
"Музокараларнинг охирги олти куни барча даврлар ичидаги энг сермаҳсули бўлди. Биз тинчлик келишувининг барча тўрт бўлими: контртеррористик кафолатлар, қўшинларни олиб чиқиш, Афғонистон ички мулоқотидаги иштирок ва музокаралар ҳамда мунтазам равишда ўт очишни тўхтатиш бўйича сезиларли силжишларга эришдик", - деб ёзди Халилзод.
У шунингдек, музокаралар вақтинча тўхтатилганини ва 9 июлдан давом этишини маълум қилди.
Аввалроқ “Толибон” ҳаракатининг Қатардаги сиёсий офиси расмий вакили Муҳаммад Суҳайл Шахин толиблар 7-8 июлда Доҳада ўтказиладиган Афғонистон бўйича анжуманда иштирок этишини билдирганди.