Жорий йилнинг январидан июни охирига қадар 20 та давлатда 38 журналист ўлдирилди. Бу ҳақда Press Emblem Campaign ноҳукумат ташкилоти хабар берди.
Ўтган йилнинг шу даврига нисбатан бу кўрсаткич 42 фоизга пасайган ва бу ижобий омил сифатида қабул қилинган. 2018 йилнинг илк 6 ойида дунёда 66 журналист ўлдирилганди.
Вазият асосан Сурия ва Ироқда ихтилофлар камайгани билан боғланган. Бироқ икки давлатдаги вазият ҳанузгача ташвиш уйғотмоқда: Мексикада 2019 йилнинг биринчи ярмида 9 журналист, Афғонистонда эса 6 журналист ўлдирилган.
Афғонистонда ушбу вазият учун асосий жавобгарлик террорчилар зиммасига юкланса, Мексикада жиноий гуруҳлар зиммасидадир.
PEC ташкилоти халқаро журналистлар гуруҳи томонидан 2004 йилда ташкил этилган бўлиб, БМТ ҳузуридаги махсус маслаҳат берувчи мақомига эга. Унинг фаолиятидан мақсад ихтилофлар, тартибсизликлар ҳудудларида ёки хавфли миссияларда ишловчи журналистларнинг ҳимояси ва хавфсизлигини кучайтириш ҳисобланади.
