Туркия Россиядан С-400 мажмуаларининг биринчи партиясини олди (видео)

Туркия мудофаа вазирлиги Россиядан С-400 зенит-ракета мажмуаларининг етказилиши бошланганини маълум қилди. Бу ҳақда Anadolu ахборот агентлиги хабар берди.

Агентлик маълумотларига кўра, С-400 қисмларидан иборат илк юк Анқарадаги “Мюртед” авиабазасига етказилган.

Туркия мудофаа вазирлигининг расмий фотосуратларида С-400 мажмуалари таркибига кирувчи бир нечта шатакчи ва транспорт-қувватлаш машинаси тасвирланган.

Туркияга С-400’нинг 4 та дивизионини етказишга шартнома 2017 йил декабрда имзоланганди.

Бу Вашингтоннинг норозилигига сабаб бўлган ва у Анқарага мажмуаларни сотиб олганлик учун санкциялар жорий қилиш билан таҳдид қилган.

Бироқ Осакада ўтган G20 саммитидан кейин Туркия президенти Ражаб Тоййиб Эрдўған АҚШ президенти Дональд Трамп Анқарага санкциялар киритмасликка ваъда берганини маълум қилган.

Аввалроқ Туркия С-400 мажмуаларини Сурия билан чегарада жойлаштиришни режалаштираётгани маълум қилинганди.