Туркия Кипр ҳудудида геология-қидирув фаолиятини янада кучайтирмоқчи

Фото: AP

Туркия Европа иттифоқининг санкцияларига қарамасдан, Кипр ҳудудида геология-қидирув фаолиятини янада кучайтирмоқчи. Бу ҳақда Туркия ташқи ишлар вазири Мавлут Човушўғлу маълум қилди, деб хабар берди NTV телеканали.

"Агарда Туркияга нисбатан бундай қарорлар қабул қиладиган бўлсангиз, биз фаолиятимизни кучайтирамиз. Ҳозирда Шарқий Ўртаер денгизида учта кемамиз бор, биз тўртинчисини ҳам жўнатамиз", - деб таъкидлади у.

Шу билан бирга Човушўғлу Евроиттифоқ "ўзи қабул қилган қарорини амалга ошириш имконсиз эканлигини" билишини айтди. У шунингдек, "ЕИ қарорини жиддий қабул қилмаслик кераклигини, чунки у Кипрнинг грек ҳамжамиятини қаноатлантириш учун қабул қилинганини" қайд этди.

Евроиттифоқ 15 июлда Кипр алоҳида иқтисодий ҳудудида бурғулаш ишларини олиб бораётгани учун Туркияга нисбатан санкциялар киритганди.