Мексикада трейлерда бир неча кун сув ва егуликсиз қолган 150 мигрант қутқарилди

Мексика полицияси трейлердан бир неча кун сув ва егуликсиз қолган 150 мигрантни қутқарди. Бу ҳақда Excelsior портали хабар берди. 

Гўёки сабзавотлар ташиб кетаётгандек бўлган юк машинаси Веракрус штатида йўл ҳаракати қоидасини бузгани учун тўхтатилган. Текширув вақтида полициячилар машина кузовидан ёрдам бериш ҳақидаги ҳайқириқларни эшитишган.

Кузов очилганда у ерда 73 нафар гватемалалик, 45 нафар гондураслик, 26 нафар салвадорлик ва 6 нафар эквадорлик аниқлаган. Улар бир неча кун сув ва егуликсиз қолиб кетганларини айтишган.

Ҳайдовчи ва унинг шериги ҳибсга олинган. Мигрантлар қорни тўйғазилиб, ватанларига қайтариш мақсадида зарур ҳужжатларни расмийлаштириш учун миграция марказига жўнатилганлар.