ЕИ афғон қизларини Ўзбекистон ва Қозоғистон университетларида ўқитиш учун 2 млн евро ажратди

Европа иттифоқи афғон аёлларини Ўзбекистон ва Қозоғистон университетларида ўқитишни молиялаштириш учун БМТ Тараққиёт дастурига 2 миллион евро миқдорида грант ажратди. Бу ҳақда ЕИ Кенгаши матбуот хизмати хабар бермоқда.

Расмий хабарга кўра, 2025 йилгача 50 нафар афғонистонлик талаба қиз Қозоғистон ва Ўзбекистондаги бакалавриат ҳамда магистратурада қишлоқ хўжалиги, амалий статистика ҳамда фойдали қазилмалар соҳасида таҳсил олади.

Шу билан бирга, «БМТ-аёллар» тузилмаси доирасида афғон қизлари ва аёлларининг тадбиркорлик ҳамда коммуникациялар соҳаларида малакасини ошириш учун ёзги мактаблар очилади.

Ушбу дастурларнинг асосий мақсади афғон аёлларининг иқтисодий ҳуқуқлари ва иш билан таъминлаш имкониятларини кенгайтиришдан иборатдир.