Ўзбекистонлик ҳарбийлар АрМИ танлови доирасида Эльбрусга биринчи бўлиб кўтарилишди

Ўзбекистон жамоаси Халқаро армия ўйинларининг “Эльбрус ҳалқаси-2019” танлови доирасида Европа ва Россиянинг энг баланд тоғ чўққиси – Эльбрусга (5642 метр) биринчи бўлиб кўтарилди. Танловда 5 та давлат ҳарбийлари иштирок этган.

Маълум қилинишича, танловнинг якуний босқичида ўзбекистонлик ҳарбийларга таянч лагер Приют 11дан (баландлиги 4,2 минг метр) чўққига кўтарилиш учун 4 соат 25 дақиқа талаб қилинган. Чўққига иккинчи бўлиб қозоғистонлик ҳарбийлар, учинчи бўлиб Ҳиндистон, тўртинчи бўлиб Россия ҳарбийлари кўтарилишган.

“Эльбрус ҳалқаси” танловида умумий ҳисобда Россия 14 та топшириқдан 9 тасида ғалаба қозониб, 1-ўринни эгаллади.

16 август Терскол қишлоғидаги Тоғ тайёргарлиги базасида танловнинг тантанали ёпилиши маросими бўлиб ўтади ва ғолиблар мукофотланади.

Энг яхши тоғ бўлими учун “Эльбрус ҳалқаси” танлови 3 августда бошланганди. Унда Ўзбекистон, Россия, Қозоғистон, Мароккаш ва Ҳиндистон ҳарбийлари иштирок этган. 

Халқаро армия ўйинлари (АрМи) 3 августдан 17 августгача 10 та давлат ҳудудида бўлиб ўтмоқда. Умумий ҳисобда 32 та танлов ўтказилиб, уларда 200 дан кўпроқ жамоа иштирок этмоқда.