Мексикада 26 киши қуролланган ҳужум қурбони бўлди

Мексиканинг Веракрус штати, Коацакоалькос шаҳридаги барлардан бирига ҳужум қилиниши оқибатида 26 киши ҳалок бўлди. Бу ҳақда штат бош прокуратураси маълум қилган. 

Таъкидланишича, ҳалок бўлганлардан 10 нафари аёл, 16 нафари эса эркак кишидир. Шунингдек, 11 киши яраланган. Барга ҳужумда камида 10 киши иштирок этган, улар барда ёнғин уюштириб, сўнгра у ердан югуриб чиқаётган одамларни ўққа тутган. 

Штат губернатори Куитлауак Гарсиянинг таъкидлашича, тегишли идоралар ҳужумнинг эҳтимолий ташкилотчисини аниқлашга муваффақ бўлган. Таъкидланишича, гап июль ойида қўлга олинган, бироқ кейинроқ қўйиб юборилган жиноятчи ҳақида бормоқда. 

Мексикада жорий йилнинг биринчи ярмида 17,6 мингдан кўпроқ киши зўравонлик қурбони бўлган. Бу эса қотилликлар бўйича “рекордчи” бўлган 2018 йилнинг шу даврига нисбатан 5,1 фоиз кўпроқдир. Қотилликларнинг аксарияти наркомафия зиммасидадир. 

2018 йил охиридан Мексикани бошқариб келаётган президент Андрес Мануэль Лопес Обрадор 20 августда унинг ҳукумати ҳозирча хавфсизлик соҳасидаги вазиятни яхшилай олмаганини тан олган. Унинг таъкидлашича, “ҳукумат вазиятни барқарорлаштира олган, бироқ жиноятлар сони камайишига ҳали эришмаган”.