«Мен UFC’даги биринчи ўзбекман»: Маҳмуд Муродов UFC билан шартнома имзолади

Ўзбекистонлик яккакураш жангчиси Маҳмуд Муродов Мутлақ жангчилик чемпионати UFC билан шартнома имзолади. Бу ҳақда Муродовнинг ўзи Instagram’да маълум қилди. 

Машҳур америкалик боксчи Флойд Мейвезер жамоасига кирувчи ўзбекистонлик яккакураш жангчиси Ўзбекистоннинг UFC’даги илк вакили бўлади. Аввалроқ америкалик Муродовни MMA’нинг энг яхши жангчиси деб атаганди.

“Мен дунёнинг энг кучли ташкилоти UFC билан шартнома имзоладим. Ўз оға-иниларим жамоасига қилинган иш учун миннатдорлик билдирмоқчиман. Биргаликда тарих ясаймиз. Мен UFC’даги биринчи ўзбекман. Қўллаб-қувватловингиз, менга ишонганингиз учун катта раҳмат. Биргаликда навбатдаги ғалаба сари олға борамиз”, деб ёзган Муродов. 

Яккакурашчининг вакиллари у 28 сентябрда Копенгагендаги мусобақада иштирок этишини маълум қилишган.

Муродов аввал Европанинг Oktagon ва XFN лигаларида иштирок этган. Унинг ҳисобида ММА’да 22 та ғалаба ва 6 та мағлубият бор.