Эроннинг Бағдоддаги элчиси АҚШнинг Ироқдаги ҳарбийларига зарба бериш билан таҳдид қилди

Эроннинг Бағдоддаги элчиси Эронга таҳдид туғилса, АҚШнинг Ироқдаги ҳарбийларига зарба берилиши мумкинлигини айтди.

"Бизда америкаликлар билан муаммолар бор: агар улар Эронга таҳдид қилишса, улар ҳамма жойда хавф остида қолишади", - деди элчи Ираж Масжидий Dijla телеканалига берган интервьюсида.

"Эронга АҚШ томонидан таҳдид бўлса, Эрон куч билан жавоб қайтаради. Биз ҳимояланамиз", - деди у.

У шу билан биргаликда Эрон минтақада вазият кескинлашишини истамаслигини маълум қилди.  

Ироқ мудофаа вазирлиги расмий вакили Таҳсин ал-Хафажий Эрон дипломатининг сўзларига изоҳ берди.

"Ироқ Эронга ҳужум қилиш учун плацдарм бўлмайди, шунингдек Ироқ ҳудудидаги Америка манфаатларига таҳдид қилинишига ҳам йўл қўймайди", - деди у.