Содиқ Сафоев: «Матвиенконинг ташрифи ҳар икки давлат ўртасида парламент дипломатияси фаоллашаётганини кўрсатади»

Бугун, 4 октябрь куни Ахборот ва оммавий коммуникациялар агентлигида Олий Мажлис Сенати раисининг биринчи ўринбосари Содиқ Сафоев иштирокида матбуот анжумани бўлиб ўтди. Анжуманда Россия Федерацияси Федерал Мажлиси Федерация Кенгаши раиси Валентина Матвиенконинг 1-3 октябрь кунлари Ўзбекистонга бўлиб ўтган расмий ташрифи якунлари  хусусида маълумот берилди.

Содиқ Сафоев мазкур ташрифнинг ҳар икки давлат учун қандай сиёсий аҳамиятга эга бўлгани борасидаги хулосаларини қуйидагича ифодалади.

«Валентина Матвиенконинг Ўзбекистонга ташрифи икки томон учун ҳам муҳим стратегик аҳамиятга эга. Бу ташриф икки давлатда ҳам парламентларнинг роли ортиб бораётганлигини кўрсатади. Ўзбекистонда ҳам, Россияда ҳам парламент дипломатияси тобора фаоллашиб бормоқда.

Парламент давлатлар ўртасидаги муносабатларни йўлга қўйишда муҳим ресурс ҳисобланади. Ҳукуматлараро муносабатлар торайиб, қисқариб боргани ҳолда, халқ вакилларининг алоқалари мустаҳкамланётганини кўриш мумкин. Бу жуда муҳим ва керак.

2019 йилнинг ўзида икки давлат ўртасида 30та ўзаро минтақавий ташрифлар амалга оширилди. Узоқ йиллар давомида кам аҳамият берилган минтақалар муносабатлари ҳам яхшиланаётганини кўриш мумкин. Ҳозирда Россиянинг 70дан зиёд субъекти Ўзбекистон билан тўғридан-тўғри алоқани йўлга қўйган», деди Сафоев.

Таъкидланишича, Ўзбекистон ва Россия ҳамкорлигида бошқа соҳалар қатори зиёрат туризми ҳам тобора кенгроқ ўринга эга бўла боряпти.