Бухорода электр тармоғидаги ортиқча юкланиш ёнғинга сабаб бўлди

Бухорода электр тармоғидаги ортиқча юкланиш ёнғинга сабаб бўлди. Бу ҳақда Ўзбекистон Республикаси ФВВ ЁХББ ОАВ билан ҳамкорлик қилиш бўлинмаси маълумотида айтилади. 

2019 йилнинг 16 октябрь куни соат 10:40да Бухоро вилояти Бухоро тумани С.Айний кўчасида яшовчи фуқаро М.Қ.нинг уйида ёнғин содир бўлаётганлиги ҳақида ёнғин-қутқарув қисмига хабар келиб тушган.

Хабар асосида воқеа жойига тўртта ёнғин ўчириш бўлинмалари жалб этилган. Биринчи бўлинмалар чақирилган манзилга 6 дақиқада етиб борган. Ёнғин соат 11:00да ўраб олиниб, соат 11:55да бартараф этилган. 

Ёнғин оқибатида яшаш уйининг 95 кв. метр майдонда томи, шифти ва ички жиҳозлари ёниб зарарланган. Тан жароҳати олганлар ва ҳалок бўлганлар қайд этилмаган. Ёнғиндан уйнинг 145 кв. метр майдони сақлаб қолинган. 

Ёнғиннинг тахминий сабаби - электр тармоғида ортиқча кучланиш. Моддий зарар миқдори аниқланмоқда.