АҚШ президенти лавозимига номзод Трампни сурияликлардан нефтни тортиб олмоқчи бўлаётганликда айблади

Фото: CNN

АҚШ президенти Дональд Трамп Сурия халқига тегишли нефть конларини эгаллаб олишни кўзламоқда. Бундай баёнот билан Fox News телеканали эфирида 2020 йилги сайловларда АҚШ президенти лавозимига Демократлар партиясидан номзод конгрессвумен Тулси Габбард чиқди.

“Қўшинларимиз олдига қўйилган вазифа АҚШ халқи ва миллий хавфсизлигини таъминлашдан иборат. Афсуски, президент Трамп бу йўналишни ўзгартирди: у аввал америкалик ҳарбийларнинг Суриядан ватанларига қайтарилишини қўллаб-қувватлаган бўлса, энди уларни Сурияда ИШИДга қарши курашиш учун эмас, балки АҚШга тегишли бўлмаган нефть конларини қўриқлаш учун қолдирмоқчи. Бу конлар Сурия халқига тегишли”, деб таъкидлаб ўтган Габбард.

Унинг таъкидлашича, бу Сурияда 2011 йилдан бери юз бераёган замонавий босқинчиликнинг исботи ҳисобланади. Сурия халқи яшаш ва ҳаётни йўлга қўйиш учун зарур бўлган захира ва энергия манбаидан маҳрум қилинмоқда. “Бу Суриядаги тузумни ўзгартиришга қаратилган охири йўқ уруш тактикасига мисолдир. Бу урушни бошлаш керакмасди ва уни ҳозироқ тўхтатиш лозим”, деб қўшимча қилган конгрессвумен.

Ўтган ҳафта АҚШ қуролли кучлари штаблари бошлиқлари қўмитаси раиси генерал Марк Милли АҚШ Сурияда Conoco компанияси нефть майдонлари устидан назоратни сақлаб қолмоқчилигини маълум қилганди. Россия мудофаа вазирлигида таъкидланишича, АҚШ Сурия нефтининг бошқа давлатларга контрабандасини амалга оширади. Шунингдек, нефть ташувчи машиналар колоннаси АҚШнинг хусусий ҳарбий компаниялари ва махсус кучлари томонидан қўриқлаб борилади.