Тирбандликларнинг олдини олиш ва назорат қилиш: Кўп қаватли уйлар тепасига юқори пикселли видеокузатув мосламалари ўрнатилади

Ўзбекистонда йўл ҳаракати хавфсизлигини таъминлаш тизимига ахборот-коммуникация технологияларини янада кенгроқ жорий қилиш мўлжалланмоқда. Бу ҳақда ҳаракат хавфсизлигини таъминлаш, йўл-транспорт ҳодисаларининг олдини олиш, йўл ҳаракати иштирокчиларига қулай шарт-шароитлар яратиш ва ИИВ Давлат йўл ҳаракати хавфсизлиги хизматининг моддий-техника базасини ривожлантириш бўйича «Йўл харитаси» лойиҳасида айтилган.

Ҳужжатга кўра, автотранспорт воситаларининг ҳаракатланиш тезлигини ошириш билан боғлиқ йўл-транспорт ҳодисаларининг олдини олиш мўлжалланмоқда.

Бунда:

йўл ҳаракатини тартибга солиш, транспорт воситаларининг тезлигини назорат қилиш мақсадида маҳаллий корхоналар томонидан ишлаб чиқарилган фото-видео қайд этиш қурилмаларини харид қилиб, йўлларга ўрнатиш ва ИИВ ДЙҲХХнинг “Маъмурий амалиёт” комплекс автоматлаштирилган ахборот тизимига интеграция қилиш;

йўл ва кўчаларда тирбандликларни ҳосил бўлишини олдини олиш, транспорт воситаларини ҳаракатланишини назорат қилиш мақсадида кўп қаватли жойлашган уйларнинг тепа қисмига юқори пикселли видеокузатув мосламаларини ўрнатиш режалаштирилган.

Ижро муддати - 2019-2020 йиллар ва 2020-2021 йиллар, масъул ижрочилар - ҚР Вазирлар Кенгаши, Тошкент шаҳар ва вилоятлар ҳокимликлари, Ахборот технологиялари ва коммуникацияларини ривожлантириш вазирлиги, ИИВ.