«Green card» лотереяси учун рўйхатдан ўтказиш жараёнлари ортидан пул ишлаш билан бирга, турли фирибгарлик ҳолатлари учраб турибди. Ички ишлар вазири матбуот котиби Шоҳрух Ғиёсовнинг сўзларига кўра, ўттиздан ортиқ шахс мингга яқин фуқаролар номидан маълумотномалар тўлдириб, «Green card» ютганларга тамагирлик қилишгани аниқланган.
«Сўнгги вақтларда Ўзбекистон фуқароларининг «Green card» лотереясида рўйхатдан ўтишга қизиқиши кучайиб бормоқда. Ўз навбатида, айримлар бу қизиқишдан фойдаланиб қолишга ҳаракат қилмоқда.
Айрим шахслар лотереядан рўйхатдан ўтказиш жараёнлари ортидан пул ишлаш билан бирга, турли фирибгарлик ҳаракатларини ҳам содир этишмоқда. Яъни, фирибгарлар фуқароларнинг шахсий ҳужжатлари нусхаларидан фойдаланган ҳолда, уларнинг хабарисиз рўйхатдан ўтиб қўйишмоқда ҳамда ушбу шахсларга лотереяда ютуқ чиқса, маълум миқдорда моддий рағбатлантириш талаб қилишмоқда.
Ана шундай вазиятдан фойдаланмоқчи бўлган айрим фирибгарлар ютуқ чиққан одамлардан турли миқдорда пул талаб қилишган, алдашган, қўрқитишган ва товламачилик қилишган», дея Шоҳрух Ғиёсовнинг сўзларини келтирмоқда Kun.uz мухбири.
Эслатиб ўтамиз, аслида «Green card» дастури бўйича рўйхатдан ўтиш мутлақо бепул бўлиб, қуйидаги йўриқномага амал қилинса кифоя. Рўйхатдан ўтган фуқаро лотереяда ютган тақдирда бунинг учун бирон бир кишига пул бериши шарт эмас.
Жорий йилдан «Green card» расмийлаштириш учун Ўзбекистон Республикаси фуқаросининг хорижга чиқиш биометрик паспорти (халқона айтганда қизил паспорт) бўлиши шарт этиб қўйилди. Бу ҳам лотерея тўлдириш жараёнидаги фирибгарликларнинг олдини олишда катта қадам бўлди. Энди шахсий маълумотларни тўлдиришда паспорт серия рақами ҳам киритилиши шарт қилиб белгиланди. Шу вақтга қадар анкетада бундай бўлим йўқ эди.
Шоҳрух Ғиёсовнинг маълумот беришича, 2018 йилги статистикага кўра, дунё бўйича мигрантлари сони 244 миллион кишини, Ўзбекистонда эса 1,2 миллион кишини (жами аҳолининг 3,6 фоизи) ташкил этган. Жумладан, Россия фуқароларнинг 10 миллион нафари (7 фоиз), Буюк Британия аҳолисининг 4,9 миллиони (7 фоиз) хориж давлатларига яшаш учун чиқиб кетган. Деярли барча давлат фуқароларининг асосий йўналиши АҚШга тўғри келади.
