«Ливерпуль»нинг ўйини мукаммаллашмоқда. Гвардиоланинг норозилиги ҳеч нарсани ўзгартирмайди

Англия чемпионати. Премьер-лига. 12-тур
«Ливерпуль» — «Манчестер Сити» — 3:1 (2:0)
Голлар: Фабинью, 6 (1:0). Салоҳ, 13 (2:0). Мане, 51 (3:0). Бернарду Силва, 78 (3:1).
«Ливерпуль»: Алиссон, Александр-Арнолд, ван Дейк, Ловрен, Робертсон, Хендерсон (Милнер, 61), Фабинью, Вайналдум, Салоҳ (Гомес, 87), Роберту Фирмино (Окслейд-Чемберлен, 79), Мане.
«Манчестер Сити»: Браво, Уокер, Стоунс, Фернандинью, Анхелиньо, Де Брейне, Эрнандес, Гундўған, Бернарду Силва, Агуэро (Габриэл Жезус, 71), Стерлинг.
Огоҳлантиришлар: Эрнандес, 65. Габриэл Жезус, 90+5.
Ҳакам: Оливер (Англия).
10 ноябрь. Ливерпуль. «Энфилд» стадиони.

Ингичка узилади. Ҳимоядаги муаммолар, ҳимоя марказига бошқа позиция футболчиларини туширишга мажбур бўлган «Манчестер Сити» асосий эътиборини ҳужумга қаратди. Бу танлов «Саутҳемптон» ёки «Астон Вилла»га қарши ўйинларда ёрдам берганди, аммо «Ливерпуль»га қарши фойдасиз бўлиб чиқди. Хосеп Гвардиола бу оқшомда ўзи айтганидек фаолиятидаги энг кучли рақибга қарши майдонга тушди.

«Шаҳарликлар» «Энфилд»да қаторасига 17 ўйиндан буён ғалаба нелигини била олмай келаётганди ва Хосеп Гвардиола жамоаси бу ўйинга идеал ҳолатда келиши талаб этиларди. Лекин жамоа ўйин арафасида янги муаммолар орттириб олди, ЕЧЛ ўйинида асосий дарвозабон Эдерсон жароҳат олиб сафдан чиқди. Албатта, жамоа Чили терма жамоасининг биринчи рақамли дарвозабони Браво билан ҳам ғалабаларга эришган, аммо бундай рақибга қарши ўйинларда эмас.

Англияда Испаниядаги каби ўйнаб кетолмаган дарвозабон фақат икки гол ўтказиб юборгандан кейингина жамоани қутқаришга урина бошлади. Унинг бу мавсумдаги статистикаси эса жуда ёмон - у ўз дарвозаси томон аниқ берилган учта зарбадан учта гол ўтказиб юборган. Албатта, уни танқид қилиш ўринли, лекин бошқа футболчиларга ҳам саволлар кўп. Масалан, Гундўған биринчи гол урилган вазиятда тўпни Фабиньога ташлаб берди, иккинчи гол урилган вазиятда Фернандиньо Салоҳга халал бера олмади, у бу ишни Анхелиньога қолдириб, ўзи Робертсоннинг узатмасини тўсишга бесамар уринди.

Бундай ўйинларда дарвозабон қутқариши керак бўлади, бу эса Бравонинг қўлидан келмади. Бу Алиссоннинг қўлидан келди. Бразилиялик футболчи ўз сэйвлари орқали рақибга ўйинга қайтишга имкон бермади. Ўйиндан олдин Клопп симульянтлигига урғу қаратган Мане эса ўз голи билан жавоб қайтарди.

Лекин ўйин охирида барибир Бернарду Силва унинг дарвозасини ишғол қилишга муваффақ бўлди, аммо бу энди ҳеч нарсани ўзгартира олмасди.

Ўйиннинг сўнгги қисмида Гвардиола майдон четида туриб тўполон қилди, чунки ўйин ҳаками Майкл Оливер ва видеотакрорлар тизими биринчи бўлимда бўлгани каби Александр-Арнолднинг қўлига тўп теккан вазият учун пенальти белгиламади.

Ижтимоий тармоқда бу бўйича мунозаралар давом этмоқда.

Pep Guardiola is not happy 😡

📺 Watch live now on Sky Sports PL or follow here: https://t.co/tIbipDtyYB pic.twitter.com/QBF18Z29mv

— Sky Sports Premier League (@SkySportsPL) November 10, 2019

Албатта, ноябрь ойида чемпионлик ҳақида гапиришга ҳали эрта, лекин бу ғалаба орқали «Ливерпуль» катта устунликка эга бўлиб олди. Мерсисайдликлар АПЛдаги сўнгги 50 ўйинида фақат бир марта мағлуб бўлишган - январь ойида «Сити»га қарши ўйинда. Ўша ўйин чемпионлик масаласини ҳал қилганди, балки бу сафарги ўйин натижаси ҳам чемпионлик масаласида муҳим аҳамиятга эга бўлиб чиқар. Буни баҳорда билиб оламиз, ҳозирча турнир жадвали етакчиси камчилиги йўқ жамоага ўхшаб кўринмоқда.