«Сити» ва «Барса» йирик ғалабалар билан бошлашди. Кун ўйинлари

Англия: Ришарлисоннинг шедеври ва Ҳоланднинг барқарорлиги

АПЛ. 1-тур. 16 август
«Астон Вилла» — Нюкасл 0:0
«Астон Вилла»: Бизот, Кэш, Конса, Мингс, Дин, Камара, Онана, Макгинн (Мален, 84), Тилеманс, Роджерс, Уоткинс.
«Нюкасл»: Поуп, Триппиер, Шер, Бёрн, Ливраменто, Бруно, Тонали, Жоэлинтон, Эланга (Мёрфи, 78), Гордон, Барнс (Осула 90).
Огоҳлантиришлар: Жоэлинтон (45) – Камара (58).
Четлатиш: Конса 66.

«Нюкасл» мавсумни исён кўтарган ва ўзини «Ливерпул»га қўйиб юборишни талаб қилаётган Исаксиз бошлади. Швециялик ҳужумчига муқобил йўқлиги туфайли Эдди Ҳау Гордон, Эланга ва Барнсдан иборат бир-бирининг ўрнини алмаштириб ўйновчи ҳужум учлигини тузди. «Астон Вилла» эса ўйинни Эмилиано Мартинессиз бошлади. Аргентиналик посбон Бирмингҳэмда қолган, аммо дисквалификация туфайли биринчи турни ўтказиб юборишга мажбур эди. Унинг ўрнини эгаллаган Бизот эса бир қанча вазиятларда мезбонларни қутқариб қолди, ҳужум вакиллари эса жуда суст ҳаракат қилишди. Унаи Эмери шогирдлари дастлабки 45 дақиқаликда рақиб дарвозаси томон бирорта ҳам зарба беролмади.

Иккинчи бўлимда эса 66-дақиқда Консанинг майдондан четлатилиши «Вилла»нинг аҳволини янада оғирлаштирди. Шундай экан, голсиз дурангни мезбонлар фойдасига ёзиш мумкин, ушбу жамоа молиявий муаммолар туфайли ёзги трансферларда фаоллик қила олмади. Ўтган мавсумда клуб фақат Дуглас Луизни сотиш эвазига АПЛдаги харажатлар лимитида балансга эриша олганди. Аммо жамоа барибир молиявий фэйр-плей қоидаларини бузган, шунинг учун ёзда УЕФА 9,5 миллион фунт миқдорида жарима қўллаган. Эмери қоидалар эскиргани ва кўплаб клубларни чеклаб, ўз олдига катта мақсадлар қўйишга халал бераётгани ҳақида гапирди. Аммо қонунларга риоя қилиш керак, шу туфайли «Вилла» янги харидлар учун харажат қила олмайди, мувозанатни эса даромадларни кескин кўтариш ёки маошларни қисқартириш орқали мувозанатлаштириш мумкин.

«Тоттенҳэм» — «Бёрнли» 3:0
Голлар: Ришарлисон 10, 60 (дубл), Жонсон 66.
«Тоттенҳэм»: Викарио, Порро, Ромеро, ван де Вен, Спенс, Грей (Бентанкур, 72), Бергвалл (Палиня, 80), Қуддус (Тел, 85), Сарр, Жонсон (Одобер, 80), Ришарлисон (Соланке, 72).
«Бёрнли»: Дубравка, Зонне (Чауна, 74), Уокер, Экдал, Эстев, Гартман, Межбри (Ларсен, 63), Каллен, Лоран (Угочукву, 63), Энтони (Эдвардс, 85), Фостер (Флеминг, 74).

«Шпорлар» биринчи турни шу қадар кўтаринки бошлашдики, энди кўпчилик Қуддус ва Ришарлисон жуфтлигини клуб афсоналари Кейн ҳамда Сон Ҳёнг Мин билан солиштирмоқда. Бу жуфтлик Европа Суперкубогида ҳам яхши ўйнаган, шанба оқшомида эса ўйинни ҳал қилишди. Ганалик яримҳимоячи икки бор ассистентлик қилди, бразилиялик ҳужумчи унинг узатмаларини голга айлантирди. Мавсум эндигина бошланганига қарамай, ҳозирдан айтиш мумкинки, Ришарлисоннинг «қайчи услуби»даги зарбаси чемпионатнинг якуний ҳит-парадидан ўрин олади.

Дубл муаллифи бу оқшомда асосий таркибдаги ўрнини Соланкедан олиб қўйди дейиш мумкин. Ришарлисон учинчи голли ҳужумда ҳам иштирок этди, Бреннан Жонсон иккинчи бўлим ўрталарида ҳисобни йириклаштирди – ўтган мавсумни 16-ўринда якунлаган жамоа янги бош мураббий Томас Франк билан янги мавсумни кучли бошламоқда. Чемпионшипдан қайтган «Бёрнли»да эса вазиятни ўзгартириш учун ҳеч қандай имконият бўлмади.

«Вулверҳэмптон» — «Манчестер Сити» 4:0
Голлар: Ҳоланд 34, 61 (дубл), Рейндерс 37, Шерки 81.
«Вулверҳэмптон»: Жозе Са, Агбаду, Т. Гомеш, Доэрти, Андре (Буэно 72), Гомес, Волфе (Лопес 72), Ҳувер (Р. Гомеш 73), Мунетси, Беллегард (Ариас 73), Ларсен (Ҳванг Ҳи Чҳанг 82)
«Манчестер Сити»: Траффорд, Рубен Диаш, Стоунс (Ҳусанов 82), Айт-Нури, Люис (Матеус Нунес 66), Рейндерс, Гонсалес, Бернарду Силва (О'Райли 66), Доку (Мармуш 66), Бобб, Ҳоланд (Шерки 73)
Огоҳлантиришлар: Доэрти, 67 – Рейндерс, 54. О'Райли, 81

«Манчестер Сити» мавсумни «Вулверҳэмптон»ни йирик ҳисобда мағлуб этиш билан бошлади, Ҳоланд эса барқарорлик намунасини кўрсатди. Аввалига Люиснинг қанотдан узатмасидан кейин тўпни бўш дарвозага киритиб юборган норвегиялик қаторасига тўртинчи мавсум илк турда гол урмоқда. Лекин бу АПЛ рекорди эмас: Эрлингдан Салоҳнинг рекордини такрорлаш учун яна иккита шундай старт талаб этилади.

Бу оқшомнинг асосий қаҳрамони эса ёзда «Милан»дан харид қилинган Тейани Рейндерс бўлди, у ўйиндаги учта голда иштирок этди. Нидерландиялик футболчи аввалига тўпни парашют услубида олдинги чизиққа ташлаб бериш орқали рақиб ҳимоясини бузиб ўтгач, Люис Ҳоландни бўш дарвоза қаршисига чиқарди, кейин эса унинг ўзи Боббнинг узатмасини голга айлантирди, иккинчи бўлимда Ҳоланднинг иккинчи голига ҳаммуаллифлик қилди. Бунгача «шаҳарликлар» сафида АПЛдаги дебютида фақат Серхио Агуэро гол ва голли пас билан бошлаганди.

Яна бир янги футболчи, «Лион»дан келган Райан Шерки ҳам захирадан майдонга тушиб, якуний натижани ўрнатди — 4:0.

Шу куни Гвардиола ўзбекистонлик ҳимоячи Абдуқодир Ҳусановни ҳам захирадан туширди, у охирги ўн дақиқаликда Жон Стоунз ўрнида ҳаракат қилди.

«Сандерлэнд» — «Вест Ҳэм» 3:0
Голлар: Майенда 61, Баллард 73, Исидор 90+2.

«Сандерленд» саккиз йил ичида илк бор АПЛга қайтди ва дарҳол «Вест Ҳэм»ни ожиз қолдирди (3:0). Барчаси иккинчи бўлимда ҳал қилинди: 20 ёшли ҳужумчи Элиэсер Майенда ва ҳимоячи Дэниэл Бэллард гол уришди.

Вилзон Изидор эса 90+2-дақиқада қарши ҳужумдан ҳисобни йириклаштирди. Француз ҳужумчиси захирадан майдонга тушди ва мураббий ишончини оқлади. Чемпионшипнинг ўтган мавсумида у 43 ўйинда 12 киритганди, энди эса АПЛда ҳам жамоасига ёрдам бермоқда.

«Сандерленд» фанатлари жамоанинг АПЛга қайтиши муносабати билан улкан баннер тайёрлашганди ва футболчилар ҳам уларни хурсанд қилишди.

«Брайтон» — «Фулҳэм» 1:1
Голлар: О'Райли 55 (пен) — Муниз 90+6.

«Брайтон» «Фулҳэм» билан ўйиннинг сўнгги дақиқасида ғалабани қўлдан чиқарди - 90+6 (1:1). 55-дақиқада Мэттю О'Райли пеналтини аниқ ижро этганди, иккинчи бўлим давомида мезбонлар захира ўриндиғидан ўйинга қўшилган Родриго Муниз эса жамоасини мағлубиятдан қутқарди. Ушбу ҳужумчига «Аталанта» қизиқаётганди, аммо «Фулҳэм» уни сотмаяпти - гол буни изоҳлади.

Якшанба куни мухлисларни янгиланган «МЮ» ва ёзги трансферларда энг фаол клублардан бири бўлган «Арсенал»ни қабул қилади. Шунингдек, «Челси» «Кристал Пэлас»га, «Ноттингҳэм Форест» бош мураббийсиз қолган «Брентфорд»га қарши ўйнайди, чемпионшипдан чиққан учинчи жамоа бўлмиш «Лидс» «Эвертон» синовидан ўтади.

Испания: Ямал ҳал қилди

Ла Лига. 1-тур
«Малёрка» – «Барселона» 0:3
Голлар: Рафиня (7), Торрес (23), Ямал (90+4).
«Малёрка» – Роман, Морей (Маскарелл, 46), Валент, Райло, Мойика (Лато, 90+1), Морланес, Санчес, Асано (Жозеф, 46), Торре (Родригес, 46), Дардер, Мурики.
«Барселона» – Гарсия, Балде (Торрентс, 68), Кубарси (Гави, 69), Араухо, Гарсия, Де Йонг, Педри, Ямал, Фермин (Олмо, 46), Рафиня (Кунде, 77), Торрес (Решфорд, 69).
Огоҳлантиришлар: Морей (9), Морланес (24, 33), Торре (42) – Рафиня (45+7).
Четлатишлар: Морланес (33), Мурики (39).

«Барселона» ҳали ҳам ўтган мавсумни давом эттираётгандек. Еттинчи дақиқа, Ямалнинг ўз услубида олис устун томон узатган паси ва Рафиня газонга сапчиган тўпни бош билан дарвоза тўрига киритиб юбориши. Шу дақиқадаёқ «Малёрка»ни бу оқшом ҳеч қандай яхшилик кутмаётгани аён бўлганди, аммо кўк-анорранглиларнинг иккинчи голи баҳсларни келтириб чиқарди. Ижтимоий тармоқларда фэйр-плей принциплари ҳақида муҳокамалар бошланиб кетди, аммо тан олиш керакки, амалда каталонияликлар ўйин қоидаларини бузишмади. Шунчаки Ямалнинг зарбасидан кейин юзи билан тўп йўлидан чиққан Раило газонда ётганганига қарамай, ҳужумни давом эттиришди.

Ҳакам ўйинни тўхтатишга асос кўрмади, Ферран Торрес эса ҳисобдаги фарқни оширди. Шу билан бирга, «Барса» футболчилари вазиятдан келиб чиқиб, голни нишонлашмади.

Мезбонларнинг муаммолари эса қор уюмидек ўсиб борди. 33-дақиқада Ямалга ишлатилган фолдан кейин Морланес майдонни барвақт тарк этди.

Бундан олдинроқ арбитр билан баҳслашгани учун огоҳлантирилганди ва қўполлиги учун унга иккинчи сариқ карточка ҳам кўрсатилди. Бўлим охирида эса Муричи тўпни эгаллашга ҳаракат қилиб, оёғини шу қадар баланд кўтардики, «Барса»нинг янги дарвозабони Жоан Гарсиянинг бошига бутсасининг остки қисми билан зарба бериб юборди. VAR билан маслаҳатлашувдан кейн албаниялик ҳужумчи тўғридан тўғри қизил карточка олиб, жамоадошларини жуда қийин аҳволга тушириб қўйди, шу билан амалда ўйин тақдири ҳал бўлди.

Лекин Ҳанси Флик жамоаси одатдаги каби голга ташналикни намойиш этмади ва мезбонлар дарвозасини тинимсиз ўққа тутмади. Аммо ўйин охиридаги баҳс вақтида рақибнинг туртишидан жаҳли чиққан Ямал бироз ўтиб ҳисобни йирик кўринишга келтирди – у Гавидан тўпни қабул қилиб олди, бир неча ҳимоячи орасидан ўтди ва юқори бурчакни аниқ нишонга олди.

Германия: Диас соврин олишни бошлади

Германия cуперкубоги
«Штутгарт» – «Бавария» 1:2
Голлар: Левелинг (90+3) – Кейн (18), Диас (77).
«Штутгарт»: Бредлов. Хакес. Шабо (Хендрикс, 71). Миттельштедт. Вагноман (Ассиньон, 81). Штиллер (Андрес, 87). Каразор (Нарти, 81). Дениз Ундав. Фюрих (Демирович, 71). Левелинг. Вольтемаде
«Бавария»: Нойер. Упамекано (Ким Мин Джэ, 80). Та. Станишич. Лаймер (Боэ, 72). Киммих. Горецка (Бишоф, 90+3). Олисе (Карл, 90+3). Диас. Гнабри (Рафаэл Геррейру, 80). Кейн
Огоҳлантиришлар: Миттелштедт (44) – (Упамекано (35), Олисе (45).

Бундеслига клубларининг аксарияти мавсумни Германия кубогининг 1/32 финал ўйинларида қуйи дивизион вакилларини яксон қилиш билан бошлаётган пайтда (кун рекордчиси «Волфсбург» 9:0 ҳисобида ғалаба қозонди), «Бавария» ва «Штутгарт» Суперкубок учун майдонга тушди. Ўтган мавсумда Германия кубогини қўлга киритган «Штутгарт» ўз стадионида яна бир совринга эга чиқиш учун ҳамма ишни қилишди, аммо ўйин тақдирини жамоалар сафидаги футболчиларнинг индивидуал маҳорати даражаси ҳал қилди.

Хусусан, ўтган мавсум кашфиёти бўлган ва «Бавария» нишонига айланган Волтамаде ажойиб позициядан туриб тўпни Нойерга қарата тепган бўлса, Кейн эса оптимал қарор қабул қилиши учун бир неча сония етарли бўлди. Ҳимоячининг хатосини пойлаб турган Ҳарри илдамлик қилди ва йиқилаётиб, тўпни дарвозага йўллади. Сценарий бўйича ўйиннинг асосий қисми ҳам шунга ўхшаш бўлди. «Штутгарт»нинг босими энг юқори чўққисига чиққанида Нойер рикошет бўлиб келган тўпни ҳам қайтарди, бунга жавобан уюштирилган ҳужумда эса Диас Гнабрининг узатмасидан кейин Германиядаги дебют ўйинида ғалаба голини нишонлади. «Ливерпул»нинг собиқ форварди каби футболчилар савиядаги фарқни кўрсатмоқда, Левелингнинг қўшимча дақиқалардаги голи эса ҳеч нарсани ўзгартира олмади.