Бош прокуратурада йиғилиш: Тошкент вилоятида экспорт прогноз режаси бўйича ҳолат қониқарсиз экани айтилди

Жорий йилнинг 7 декабрь куни Ўзбекистон Республикаси Бош прокуратурасида Тошкент вилоятининг экспорт ва инвестиция прогноз кўрсаткичларининг бажарилиши, уй-жойлари бузилиши муносабати билан компенсация тўловларининг тўланиши аҳволи, вилоятда хатлов натижасида аниқланган бўш бинолар ва ерга оид қонунбузилишлар бўйича танқидий руҳда  йиғилиш ўтказилди.

Унда экспорт салоҳиятини ривожлантириш бўйича Республика комиссия аъзолари ҳамда Тошкент вилоят хокими Рустам Холматов ҳамда туман-шаҳар ҳокимлари қатнашди.

Йиғилишда вилоятда экспорт прогноз режасини бажарилиши аҳволи қониқарсиз ҳолатда эканлиги, бу борада ишларни жадаллаштириш ҳамда тегишли чоралар кўрилиши лозимлиги таъкидлаб ўтилди. 

2019 йил январь-ноябрь ойларида ҳудудий тасарруфдаги корхоналар томонидан 245,3 млн долларлик экспорт амалга оширилиб, прогноз (349 млн. доллар) ижроси – 70 фоизни ташкил этди.

Ҳисобот даврида Ўрта Чирчиқ, Оҳангарон, Чиноз, Тошкент, Оққўрғон, Юқори Чирчиқ, Бекобод туманлари ҳамда Янгийўл ва Олмалиқ шаҳарларида прогноз ижроси 60 фоизга ҳам етмаган. 

Шу билан бирга, 2019 йил 1 декбарь ҳолатига вилоят тасарруфидаги 109 та  корхоналарнинг экспорт шартномалари бўйича 40,6 млн доллар миқдорида муддати ўтган дебитор қарздорлиги юзага келган.

Бундан ташқари, йиғилишда вилоятда уй-жойлари бузилиши муносабати билан  компенсация тўловлари тўланиш аҳволи қониқарсиз аҳволда эканлиги таъкидланди. 

Шунингдек, вилоятда ўтказилган хатловларда 4 801 та бўш объект ҳамда фойдаланилмаётган ишлаб чиқариш майдони аниқланганлиги, 869 та давлат ва давлат улуши мавжуд бўлган объектдан самарали фойдаланилишига эришилмаганлиги, 1 948 та бўш турган объектнинг кадастр ҳужжати мавжуд эмаслиги, 2 054 та объектни ишга тушириш бўйича инвестиция лойиҳалари ишлаб чиқилмаганлиги, инвестиция лойиҳасини амалга оширмаган 996 та мулкдорга нисбатан таъсирчан солиқ чоралари қўлланилмаганлиги эътироф этилди. 

Йиғилишда, Тошкент вилоятида ерга оид бўлган қонун бузилишлар ҳолатлари ҳақида ҳам тўхталиб ўтилди. 

Жумладан,  8 955 та ҳолатда 1 121 гектар ер майдони ўзбошимчалик билан эгаллангани, 3 502 та ҳолатда 321 гектар майдонга ноқонуний қурилиш  қилингани, 25 та ҳолатда 58 гектар ер майдони ноқонуний  ажратилганлиги, 38 та ҳолатда 199 гектар ер майдонидан самарасиз фойдаланилганлиги, жами 733 842 та кўчмас мулк объектларидан 142 329 таси  ёки 19 фоизида ҳуқуқий ҳужжати мавжуд эмаслиги баён қилинди. 

Мажлисда Янгийўл ва Олмалиқ шаҳар, Бекобод ҳамда Янгийўл тумани ҳокимларининг кун тартибидаги масалалар бўйича изоҳ ва тушунтиришлари эшитилди.  

Мажлис якуни бўйича экспорт прогноз режасини амалда бажарилишини таъминлаш, тўғридан тўғри хорижий инвестицияларни жалб этиш чораларини кескин ошириш, компенсация тўловларини ўз вақтида белгиланган тартибда тўлаш чораларини кўриш бўйича аниқ тегишли чора-тадбирлар белгиланди.