Украинада энг катта таъсирга эга кишилар рейтингида Сорос иккинчи ўринни эгаллади

Америкалик молиячи Жорж Сорос Украинанинг «Вести» медиа-холдинги томонидан тузилган Украинадаги энг катта таъсирга эга кишилар рейтингида президент Владимир Зеленскийдан кейин иккинчи ўринни эгаллади.

Америкалик молиячи Жорж Сорос / Фото: Getty Images

Рейтингни тузишда қатнашган экспертлар президент Зеленскийни нафақат эгаллаб турган лавозими туфайли, балки сайловларда сайловчиларнинг ишончли қўллаб-қувватлашига (иккинчи турда 73 фоиз овоз) эга бўлгани учун ҳам биринчи ўринга қўйишган.

Қайд этилишича, иккинчи ўринга жойлашган Жорж Сорос Украинадаги ўнлаб ижтимоий-сиёсий ташкилотларга ҳомийлик қилиш орқали мамлакатдаги жараёнларга катта таъсир кўрсатмоқда.

Рейтингнинг учинчи поғонасидан украиналик миллиардер, "Интерпайп" концерни эгаси Виктор Пинчук жой олди. Маълум қилинишича, Пинчук билан алоқадор депутатлар барча партиялардаги фракцияларда бор.

Рўйхатда тўртинчи ўринда президент офиси раҳбари Андрей Богдан, бешинчи ўринда олигарх Игорь Коломойский жойлашган.

Украинанинг энг катта таъсирга эга кишилари рейтингида олтинчи ўрин ички ишлар вазири Арсен Аваков, еттинчи ўрин бизнесмен Ринат Ахметовга насиб этди.

Кейинги ўринларда "Оппозиционная платформа - За жизнь" партияси сиёсий кенгаши раҳбари Виктор Медведчук, Украинанинг собиқ президенти Пётр Порошенко ва собиқ бош вазир, "Батькившчина" партияси етакчиси Юлия Тимошенко жойлашган.