Трамп: Украинада тинчлик кўпчилик ўйлагандан ҳам яқин

АҚШ президенти Доналд Трамп Россиянинг Украина шаҳарларига навбатдаги ҳужумлари давом этаётганига қарамай, Украинадаги урушни тугатиш имконияти юқори эканини билдирди. Айни пайтда, Financial Times нашри манбалари Россия 2027 йилгача мазмунли тинчлик музокараларига киришмаслиги мумкинлигини маълум қилди.

Фото: AP

Оқ уйда журналистлар билан мулоқот қилган Доналд Трамп Россия президенти Владимир Путин билан яқинда ўтказган телефон суҳбати унда оптимизм уйғотганини айтди.

«Президент Путин бу уруш тугашини истайди. Мен буни аниқ айта оламан. Москва ва Киев ўртасидаги тинчлик келишуви кўпчилик ўйлагандан ҳам яқин», — деди Трамп.

Унинг таъкидлашича, Украина президенти Володимир Зеленский ҳам урушга барҳам бериш тарафдори. Шу боис АҚШ маъмурияти жанговар ҳаракатларни тўхтатиш бўйича дипломатик саъй-ҳаракатларни давом эттирмоқда.

Трамп Украинадаги вазиятни яқин кунларда ўтказиладиган НАТО саммитида муҳокама қилишини маълум қилди. Reuters агентлиги тарқатган маълумотга кўра, АҚШ президенти саммит доирасида Володимир Зеленский билан учрашишни, шундан кейин эса Владимир Путин билан яна телефон орқали мулоқот қилишни режалаштирган.

Бироқ Financial Times нашрининг Москвадаги манбалари вазиятга нисбатан бошқача баҳони келтирмоқда. Нашр маълумотларига кўра, Россия 2027 йил феврал ойигача Украина бўйича мазмунли тинчлик музокараларида иштирок этиш ниятида эмас.

Манбаларнинг таъкидлашича, бундай муддат Россия раҳбариятининг 2026 йил охирига қадар Донецк вилоятининг қолган қисмини тўлиқ назоратга олиш режалари билан боғлиқ бўлиши мумкин.

Financial Times суҳбатлашган украиналик юқори лавозимли амалдорлар Россия томони аввалги музокараларда АҚШ воситачилари орқали Украинадан кенг кўламли ҳудудий ва сиёсий ён беришларни талаб қилганини айтган.

Нашр манбаларига кўра, Кремль ҳозир ҳам Киевдан жиддий имтиёзлар кутаётган бўлиб, Россиянинг музокаралардаги ҳозирги позицияси томонлар ўртасида яқин вақтда келишувга эришиш учун етарли асос йўқлигини кўрсатмоқда.