Москва Зеленский Донбассдаги урушни тўхтатиши учун зарур бўладиган чораларни айтиб ўтди

Россия президенти матбуот котиби Дмитрий Песков “Биринчи канал”нинг “Большая игра” (“Катта ўйин”) дастурида Украина президенти Владимир Зеленский Донбассдаги ҳарбий ихтилофни ҳал қилиш учун бажариши керак бўлган шартларни маълум қилди.  

“Зеленский ихтилофни чин дилдан ҳал қилишни истамоқда, бироқ бу иродали бўлишни, сиёсий обрў ва Украина сиёсий майдонида етакчи бўлишни талаб этади”, деб айтган Песков. Унинг таъкидлашича, Украина президенти “уруш партияси”га кирмайди.

Песков Зеленскийнинг аввалроқ Минск келишувларига ўзгартиришлар киритиш кераклиги ҳақидаги сўзларига тўхталиб, бу Киев ва ўз мустақиллигини эълон қилган Донецк ва Луганск халқ республикаларининг биргаликдаги ҳамкорлигидагина мумкинлигини айтган.  

9 декабрда Парижда Россия, Украина, Германия ва Франция етакчилари иштирокида Донбасс бўйича “норманд тўртлиги” саммити бўлиб ўтди. Учрашув якунларига кўра, томонлар Украина шарқидаги вазиятни тартибга солиш бўйича ҳужжатни имзолашди. Бундан ташқари, Путин ва Зеленский алоҳида учрашув ўтказиб, ўзаро ушлаб турилган шахсларни йил охиригача “барчани барчага” шаклида айирбошлашга ва газ масаласига ойдинлик киритишга келишиб олишган.