Хитойнинг Huawei компанияси сотув ҳажми 2019 йилда 18 фоизга ошди ва 850 млрд юанга ($121 млрд) етди. Бу ҳақда компания бошқаруви раиси Эрик Сюй ходимларга йўллаган байрам мурожаатида маълум қилди.
Унинг қайд этишича, АҚШ ҳукуматининг компания бизнесини чеклашга уринишларига қарамасдан, Huawei ана шундай натижага эришган.
Сюй 2020 йил компания учун оғир бўлишини ва Huawei 2019 йилнинг биринчи ярмидаги каби ўсишга эриша олмаслигини айтган.
«АҚШ ҳукумати бундан буён ҳам Huawei гуллаб-яшнаши учун оғир шароитлар ҳосил қилиб илғор технологиялар ривожланишига тўсқинлик қилишда давом этади», — деб ёзган Сюй.
2019 йил май ойида АҚШ ҳукумати Huawei компаниясини қора рўйхатга киритди. Санкцияларга кўра, компанияга Америка компанияларининг технология ва қурилмаларини сотиш тақиқланади.
