Samsung 2019 йилда 5G-смартфонлардан 6,7 млн донадан кўпроқ ишлаб чиқарди

Samsung компанияси 2019 йилда 5G тармоқларини қўллаб-қувватловчи Galaxy смартфонларидан неча дона ишлаб чиқаргани маълум қилинди. TechCrunch нашрининг хабар беришича, бундай смартфонлардан ўтган йил 6,7 млндан кўпроқ ишлаб чиқарилган.
 
Компаниянинг илк 5G-смартфонлари 2019 йил майида бозорга чиқарилган. Сентябрда Samsung вице-президенти Жун Хи Ли компаниянинг 5G функцияли смартфонларидан 2 млндан кўпроқ одам фойдаланаётганини маълум қилган. У, шунингдек, компания бу рақамни йил охиригача 2 мартага оширишни режалаштираётганини айтган. 

Counterpoint Reserach тадқиқот компанияси маълумотларига кўра, 5G-смартфонлар жаҳон бозорининг 53,9 фоизини айнан Samsung қурилмалари эгаллайди. 

Таъкидланишича, компания февралда 5G’ни қўллаб-қувватловчи Galaxy S11’ни чиқаради.

Шу билан бирга Samsung’нинг асосий рақобатчиларидан бири бўлган Apple’да ҳали бирорта 5G-смартфон йўқ. Таҳлилчи Минг-Чи Куонинг таъкидлашича, АҚШ компаниясининг 2020 йилда тақдим қилинадиган барча смартфонлари 5G’ни тармоқни қўллаб-қувватлайди.

5G тармоқ бўйича интернетга уланиш ўртача тезлиги 10 Гбит/сонияни ташкил қилади.