Samsung иш ташлаш бошланишига 1,5 соат қолганда касаба уюшмаси билан келишувга эришди

Бир неча кунлик натижасиз музокаралардан сўнг, томонлар меҳнат вазири Ким Ёнхун иштирокида музокара ўтказди ва маҳаллий вақт билан тахминан соат 22:30 да – иш ташлаш бошланиши белгиланган муддатга 90 дақиқа қолганда – келишувга эришди.

Samsung Electronics ходимлари касаба уюшмаси раиси Чхве Синхонинг маълум қилишича, иш берувчи билан эришилган келишув лойиҳаси 27 майга қадар касаба уюшмалари аъзолари ўртасида овозга қўйилади. У ходимларни одатдагидек ишга чиқишга чақирди.

Келишувга кўра, яримўтказгичлар ишлаб чиқариш бўлинмаси ходимлари амалдаги бонус тизимига қўшимча равишда, компания операцион фойдасининг 10,5 фоизини олади. Шунингдек, иш ҳақлари ўртача 6,2 фоизга оширилиши назарда тутилган.

Samsung ходимларининг иш ташлаши – сунъий интеллект тизимлари учун яримўтказгичларга талаб ортиб бораётган бир пайтда кун тартибига чиққан эди. Сунгкюнкван университети профессори Квон Сокжуннинг айтишича, Samsung компанияси – Корея экспорти, фонд бозори ва яримўтказгичлар таъминот занжирида марказий ўрин тутиши сабабли, иш фаолиятининг ҳар қандай тўхташи “миллий саноат учун жиддий хавф” бўлар эди.

Financial Times'нинг қайд этишича, Samsung Electronics ва унинг маҳаллий рақобатчиси SK Hynix сунъий интеллект компаниялари орасида талаб юқори бўлган яримўтказгичлар ва юқори тезликда ишловчи хотира микросхемалари бозорида деярли дуополияга эга.

Аввалроқ Корея савдо, саноат ва энергетика вазири Ким Чжонгван иш ташлаш оқибатида иқтисодиётга етказилиши мумкин бўлган зарарни 100 трлн вон (66 млрд доллар) деб баҳолаганди. Унинг сўзларига кўра, Samsung'даги норозилик акциялари яна 1,7 мингта компания фаолиятига ҳам таъсир қилиши мумкин эди.

The Korea Times газетаси ёзишича, иш ташлаш амалга оширилган тақдирда кунлик йўқотишлар 1 трлн вондан (тахминан 664 млн доллар) ошиб кетиши мумкин эди.