Lufthansa Канада бош вазирининг баёнотидан кейин Теҳронга учган самолётини ортга қайтарди

Германиянинг Lufthansa авиакомпанияси Франкфурт-Майндан Теҳронга учган самолётини бир соатлик парвоздан кейин ортга қайтарди.

Самолёт Канада бош вазири Жастин Трюдо бир нечта манбаларнинг разведка маълумотларига таяниб Украинанинг Теҳронда ҳалокатга учраган Boeing 737-800 самолёти Эрон ракетаси билан уриб туширилганини маълум қилгандан кейин қайтарилган.

Lufthansa вакилининг “Франс Пресс” ахборот агентлигига маълум қилишича, 9 январь кечки пайт учган Airbus A330 самолёти “эҳтиёткорлик мақсадида ортга қайтарилган”. Унинг таъкидлашича, компания “Теҳрон аэропорти атрофидаги ҳаво ҳудудидаги хавфсизлик билан боғлиқ вазиятни” баҳоламоқда.

Авиакомпаниянинг 10 январга Теҳронга белгиланган рейслари ҳам бекор қилинган.

“Украина халқаро авиалиниялари” компаниясининг Теҳрондан Киевга рейс бажарган Boeing 737-800 йўловчи самолёти 8 январь эрталаб Теҳрон аэропортидан ҳавога кўтарилгандан кўп ўтмай ҳалокатга учраган. Самолётда бўлган барча 176 киши, жумладан 167 йўловчи ва экипажнинг 9 аъзоси ҳалок бўлган. Улар орасида Эрон, Украина, Канада, Германия, Швеция ва Афғонистон фуқаролари бўлган.