Эрон Яқин Шарқ мамлакатларидаги энергетика объектларига зарба беришини эълон қилди

Саудия Арабистонидаги Samref нефтни қайта ишлаш заводи ва Ал-Жубайл нефт-кимё мажмуаси, БААдаги Ал-Ҳусн газ кони, Mesaieed Holding компаниясининг нефт-кимё мажмуаси ва Қатардаги Рас-Лаффан нефтни қайта ишлаш заводи нишонлар сифатида тилга олинган.

Фото: Reuters

Теҳрон араб давлатларидаги энергетика объектларига зарба берилиши ҳақида огоҳлантирди, деб хабар берди Эрон давлат телерадиокомпанияси.

"Саудия Арабистон, БАА ва Қатардаги нефт объектлари ҳудудларини тарк этинг", — дейилади хабарда.

Маълумот берилишича, Саудия Арабистонидаги Samref нефтни қайта ишлаш заводи ва Ал-Жубайл нефт-кимё мажмуаси, БААдаги Ал-Ҳусн газ кони, Mesaieed Holding компаниясининг нефт-кимё мажмуаси ва Қатардаги Рас-Лаффан нефтни қайта ишлаш заводи нишонлар сифатида тилга олинган.

Уларга яқин соатларда ҳужум қилиниши айтилди. Эрон ҳарбий қўмондонлиги бу маълумотни тасдиқлади.

Ушбу огоҳлантириш Теҳрон АҚШ ва Исроил Эрон жанубидаги нефт-газ объектларига зарба бергани ҳақида хабар қилганидан сўнг эълон қилинди.

Bloomberg нашрининг ёзишича, Форс кўрфазидаги нефт қазиб олиш билан шуғулланувчи корхоналар ўз ходимларини эвакуация қилишни бошлаган.

Тайёрлаган Дилшодбек Асқаров

#Теҳрон #Яқин Шарқ #нефт-газ

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.