«Энг катта бойлигим - оилам соғлиги ва тинчлиги». Москвада бўёқчилик қилган ўзбек аёли уйига қайтди

Яқинда сайтимиз орқали «Россиядаги ҳаёт, одамларнинг муносабати, 15-16 соатлик иш, қийинчиликлар ва орзулар - мусофирчиликдаги ўзбек аёли билан суҳбат» сарлавҳали мақола эълон қилган эдик.

Унда сирдарёлик 39 ёшли Дилором Маҳамматова ҳақида сўз борганди. Дилором опа Россиядаги салкам 8 йиллик ҳаёти, кўрган-кечирганлари, мусофирчиликдаги қийинчиликлар, Москвадаги ўзбеклар ва ўзбек аёлларига муносабат ҳақида гапириб берган эди.  

Орадан кўп вақт ўтмай Дилором Маҳамматова яхши инсонлар кўмаги билан Москвадан уйига, Ўзбекистонга қайтди. Дилором опани кутиб олиш мақсадида дастлаб Тошкент халқаро аэропортига бордик. У ерга биздан ташқари, Дилором опанинг отаси ва фарзандлари ҳам кутиб олишга келишган экан. Улар билан кўришиб, суҳбатлашдик.  

Шундан сўнг Москва-Тошкент йўналишидаги самолётда аэропортдан чиқиб келган Дилором опани қизлари, ўғли ва отаси қучоқ очиб кутиб олишди.  

Биз Дилором опа хонадонида меҳмон бўлдик. Улар Сирдарёнинг Ховос туманидаги оддийгина хонадонда ҳаёт кечирар экан. Дилором опа ва отаси Файзулла Маҳамматов билан суҳбатлашдик. 

«Бир интервью билан уйгача етиб келдим. Жудаям хурсандман. Шу ергача етиб келишимга ёрдам беришган барча яхшиларга ўз миннатдорчилигимни билдираман. Улар учун ҳар доим дуодаман. Отам ва фарзандларим ёнида ўзимни жудаям яхши ҳис қиляпман. Мен учун энг катта бахт - оилам соғлиги, тинчлиги. Энди баҳорда ўғлимни уйлантираман. Ўзимга яраша тўй қиламан. Дабдабали тўй қилиш ниятим йўқ. Айтиб ўтганимдек, энг катта орзуим меҳрибонлик уйидаги болаларга суннат тўй қилиб бериш. Тўйдан кейин иккита фарзандим учта бўлади. Агар ўзимиздан иш топа олсам, Москвага кетиш ниятим йўқ. Яна бир бор барчага раҳмат» дейди Дилором Маҳамматова.