Тошкент давлат стоматология институти халқаро ISO сертификатига эга бўлди

Пойтахтимизда ташкил этилган “Олий тиббий таълим тизимини Марказий Осиёда халқаро таълим дастурларини амалга оширувчи “ХАБ”га айлантиришга доир ислоҳотлар” мавзуида ўтказилган халқаро ўқув-услубий конференция очилишида Тошкент давлат стоматология институтига халқаро ISO сертификати топширилди. Бу ҳақда Соғлиқни сақлаш вазирлиги Жамоатчилик билан алоқалар бўлими хабар бермоқда.

– Юртимиздаги олий таълим муассасалари орасида биринчилардан бўлиб, институтимизнинг халқаро ISO сертификатига эга бўлганидан жудаям мамнунмиз,– дейди Тошкент давлат стоматология институти ректори Жасур Ризаев. – Бу таълим жараёни халқаро стандартларга мос равишда давом этаётгани, халқаро рейтингларга кириш имкониятимиз ошиб, институтимиз нафақат юртимизда, балки чет элда ҳам ўз рейтингига эга бўлишини англатади.

Умуман олганда, олий ўқув юртимиз кўплаб ютуқларга эришиб келмоқда. Жумладан, ўтган йилда институтимизда “Стоматология Юга-2019” халқаро олимпиадаси ўтказилди ва унда талабаларимиз энг юқори ўринларни эгаллади. Шунингдек, муассасамиз Халқаро стоматологлар федерацияси, Европа кариесология ассоциацияси, Халқаро тиббиёт талабалари уюшмалари федерацияси, Америка ринологлар жамияти ҳамда Япония жарроҳлар уюшмасининг тўлақонли аъзоси бўлди.

Эътироф этиш жоизки, Тошкент давлат стоматология институтида 2017-2018 ўқув йилидан бошлаб факультетларнинг барча курсларида айрим мутахассислик фанларини инглиз тилида ўқитиш йўлга қўйилди. Бундай замонавий имкониятлар малакали кадрлар тайёрлаш, стоматология соҳасида жаҳон тиббиётининг илғор тажрибаларини кенг жорий этиш, халқимизга кўрсатилаётган стоматологик хизматни сифат жиҳатдан янги босқичга олиб чиқишда муҳим қадам бўлмоқда.

Бундан ташқари, институт ўқитувчи ва талабаларининг хорижда малака ошириб келишлари, чет эл олий ўқув юртлари профессор-ўқитувчиларининг талабаларга маҳорат дарслари ўтишларига ҳам алоҳида эътибор қаратилмоқда. Институтда халқаро қўшма икки дипломли таълим дастурлари сони бакалавр босқичида 4 та, магистратурада 9 та, клиник ординатура йўналиши бўйича 3 тага етди. 

Таълим сифатини назорат қилиш инспекцияси томонидан тузилган рейтингда Тошкент давлат стоматология институти Ўзбекистон олий ўқув юртлари орасида 8-ўринни эгаллаб, тиббиёт олий таълим муассасалари орасида энг юқори натижани қўлга киритди.