Шимолий Америкада йилнинг энг яхши автомобиллари эълон қилинди 

«Шимолий Америка йил автомобили» танлови ҳакамлар ҳайъати учта йўналиш - энг яхши енгил автомобил, энг яхши кроссовер ва энг яхши пикап йўналишларида ғолибларни аниқлади. 

Ҳакамлар ҳайъати автомобиллар оламини ёритувчи 50 нафар америкалик ва канадалик журналистдан иборат бўлган.

Танлов учта босқичда ўтказилиб, унинг илк босқичи 2019 йил июнда бўлиб ўтган. Ҳакамлар ҳар бир автомобилни ўз сегментида етакчилик қилиши, унда қўлланган инновациялар, интерьери ва экстерьери дизайни, хавфсизлиги, юриш кўрсаткичлари ва эгасининг ундан қониқиши бўйича баҳолашган.

Натижада 30 та даъвогар моделдан 3 тадан финалчи танлаб олинган. 

Танлов натижаларига кўра, 2020 йилнинг энг яхши енгил автомобили деб Chevrolet Corvette Stingray C8 топилган. У овоз беришда Hyundai Sonata ва Toyota Supra’ни ортда қолдирган.

Кроссоверлар орасида энг яхши 8 ўриндиқли Kia Telluride бўлган. 2-ўринни Hyundai Palisade, 3-ўринни Lincoln Aviator эгаллаган.

Пикаплар орасида Jeep Gladiator энг яхши деб эътироф этилган. У бу борада Ford Ranger ва Ram Heavy Duty’ни ортда қолдирган.

2019 йилда Шимолий Америкада энг яхши енгил автомобил Genesis G70, энг яхши кроссовер Hyundai Kona ва энг яхши пикап Ram 1500 бўлган.