Гулистон шаҳрида «Cobalt» ҳайдовчиси қарама-қарши йўлга чиқиб кетиб, камида 7 йўловчини олиб кетаётган «Damas» билан тўқнашиши оқибатида «Damas» ҳайдовчиси ва 4 йўловчи ҳалок бўлди, яна 2 киши шифохонада,
Бугун, 1 феврал куни эрталаб соат 08:30ларда 19 ёшли Ш.Б. «Cobalt» автомашинасида Гулистон шаҳар 4-мавзе Гулистон кўчаси бўйлаб ўтган автомобиль йўлида бошқарувни йўқотиши оқибатида йўлнинг қарама-қарши йўналишига ўтиб кетиб, 21 ёшли С.М. бошқарувида бўлган «Damas» билан тўқнашиб кетди.
ИИВ ҳузуридаги Тергов департаментидан маълум қилишларича, ҳодиса оқибатида «Damas» ҳайдовчиси С.М., йўловчилари – 55 ёшли Ш.А., 27 ёшли Д.Э., 28 ёшли М.С.лар воқеа жойида вафот этган. Яна 3 киши шифохонага ётқизилган.
Шунингдек, 24 ёшли С.А.га кўрсатилган тиббий ёрдамга қарамай, шифохонада вафот этган.
Ҳолат юзасидан Сирдарё вилояти ИИБ ҳузуридаги Тергов бошқармаси томонидан Жиноят кодекининг 266-моддаси 3-қисми «а» банди (Одамлар ўлимига сабаб бўлган транспорт воситасини бошқарувчи шахс томонидан транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Дастлабки тергов ҳаракатлари давом эттирилмоқда.