Тожикистон Россиядан коронавирусга қарши курашда ёрдам сўради

Тожикистон соғлиқни сақлаш вазирлиги янги турдаги коронавирус тарқалишининг олдини олишда Россиядан ёрдам сўради. Бу ҳақда мамлакат соғлиқни сақлаш вазирлиги матбуот хизмати бошлиғи Бибихонум Дарвешзода маълум қилди.

Фото: REUTERS

Унинг сўзларига кўра, Роспотребнадзор бу борада кўмак беришни ваъда қилган. Ҳозирда Тожикистон тепловизорлар, диагностика ускуналари ва дори воситалари етказиб берилишини кутмоқда.

Шу билан бирга, Тожикистон шифокорларни махсус либос билан таъминлаш бўйича Жаҳон соғлиқни сақлаш ташкилоти билан музокара бошлаган.

Аввалроқ Россия ЕОИИ ва МДҲ давлатларига коронавирусни лаборатор диагностика қилиш воситаларини етказиб бераётгани хабар қилинганди.

Сўнгги маълумотларга кўра, Хитойда янги коронавирусдан бир кун ичида 57 киши вафот этди. Шу тариқа, эпидемия бошлангандан бери унинг қурбонлари сони 361 нафарга етди, касалланганлар эса яна 2829 кишига кўпайиб, 17205 нафарни ташкил қилмоқда. Яна 22 давлатда 148 киши касалликка чалингани қайд этилган.

Тайёрлаган Дилшод Аскаров

#Тожикистон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.