Хитой авиакомпаниялари хорижлик учувчиларни оммавий тарзда ишдан бўшатишни бошлади

Хитойдаги бир нечта йирик авиаташувчилар хорижлик учувчиларни оммавий равишда ишдан бўшатишни бошлади, деб хабар бермоқда South China Morning Post. 

РБК манбаларидан бирининг сўзларига кўра, учувчиларни ишдан бўшатишмаяпти, балки «маош тўланмайдиган таътилга чиқаришмоқда».

Газетанинг ёзишича, China Southern Airlines, Xiamen Airlines, Hainan Airlines, Tianjin Airlines ва Beijing Capital Airlines каби авиакомпаниялар хорижлик учувчилар билан шартномаларни бекор қилишга қарор қилган. Хабарда айтилишича, учувчиларга ишдан кетиш ёки ойлик маош сезиларли даражада камайган ҳолда ишлаш таклиф қилинмоқда.

Нашр мазкур вазиятни коронавирус тарқалиши билан изоҳламоқда. Маълумотларга кўра, 23 январгача мамлакатда авиаташувлар бозори ўсиб борган бўлса, эндиликда вазият кундан-кунга ёмонлашиб бормоқда.

Охирги маълумотларга кўра, Хитойда коронавируснинг янги тури туфайли келиб чиққан зотилжамдан вафот этганлар сони 722 нафарга етди, 34 546 кишида касалланиш ҳолати қайд этилди.