Хитойда ўта реалистик U1 одамсимон-ҳамроҳ роботи тақдим этилди

Хитойнинг UBTech Robotics компанияси глобал тақдимотда оммавий ишлаб чиқариш ва кундалик фойдаланишга мўлжалланган, дунёдаги илк тўлиқ ўлчамли ултрабионик андроидлар серияси бўлган UWORLD U1 одамсимон роботини намойиш этди.

Тақдимотда компания асосчиси ва бош директори Чжоу Цзян «инсон ва робот симбиози» стратегиясини тақдим этди. Унинг сўзларига кўра, келажак роботлари нафақат хавфли ишларни бажарибгина қолмай, балки одамларнинг ҳиссий фаровонлигини қўллаб-қувватловчи тўлақонли ҳамроҳларга айланиши керак.

Янги туркум учта моделни ўз ичига олади:

• U1 Lite (ярим гавдали)

• U1 Pro (юқори унумдорликка эга тўлиқ гавдали)

• U1 Ultra (юқори динамикага эга флагман версия)

Роботлар эркак (бўйи ≈183 см, вазни ≈42 кг) ва аёл (≈168 см, ≈35,2 кг) версияларида мавжуд.

Асосий хусусиятлари:

• 88 та ҳаракат эркинлиги даражаси;

• Биомиметик силикон тери, реалистик соч ва ифодали кўзлар;

• Инсоннинг асосий ҳаракатларининг 90 фоизигача такрорлаш имконини берувчи махсус биомиметик бўйин умуртқаси;

• Rockchip RK3588 процессорида ишлайдиган маҳаллий ҳиссий сунъий интеллект;

• 20 дан ортиқ ҳиссий ҳолатни 90 фоиздан юқори аниқликда таниб олиш;

• Узоқ муддатли хотира, проактив мулоқот ҳамда нутқ ва мимиканинг синхронлашуви;

• Махфийликни ҳимоя қилишнинг уч босқичли тизими (маълумотлар асосан локал тарзда қайта ишланади).

Роботлар ақл бовар қилмас даражада реалистик кўринади, шу билан бирга компания уларнинг интим муносабатлар учун мўлжалланмаганини маълум қилди.

U1 роботининг асосий вазифаси — ҳиссий қўллаб-қувватлаш ва ҳамроҳлик қилиш.

Роботлар қуйидаги аудиторияга мўлжалланган:

• Ёлғиз кишилар (Хитойда уларнинг сони қарийб 90 миллионни ташкил этади);

• Кексаларни парваришлаш;

• Меҳмонларни кутиб олиш, таълим, туризм ва кўргазмалар;

• Психологик ёрдам кўрсатиш.

Шунингдек, компания ижтимоий ташаббусни ҳам эълон қилди: 2026 йилда аҳолининг эҳтиёжманд қатламларига 100 та махсус робот (жумладан, яқин кишиларнинг ташқи қиёфаси ва овозини қайта тиклаш имконияти билан) топширилади.

Нархлар базавий версиялар учун 119 800 юандан (≈17 650 АҚШ доллари) бошланиб, энг юқори конфигурациялар учун 990 000 юангача (≈145 700 АҚШ доллари) етади.

Тақдимотнинг ўзидаёқ компания 13 мингдан ортиқ буюртма олди, маҳсулот саҳифаси эса бир миллиондан кўп марта кўрилди. Дастлабки роботларни етказиб бериш 2026 йил сентябрь ойида кутилмоқда.

U1 роботларининг ишга туширилиши одамсимон робототехниканинг саноатдан маиший фойдаланишга ўтаётганининг глобал белгисидир. Бироқ, экспертлар бир қатор қийинчиликлар мавжудлигини таъкидламоқда: реал уй шароитида табиий хулқ-атворни таъминлаш, хавфсизлик ва махфийликка оид қатъий талабларга риоя қилиш шулар жумласидандир.

Компания U1 моделини роботларни келажакнинг ҳақиқий «рақамли ҳамроҳлари»га айлантирадиган ютуқ сифатида тақдим этмоқда. Ҳозирча бундай қурилмалар миллионлаб одамларнинг кундалик ҳаётига қанчалик тез кириб бориши ва жамият гиперреалистик андроидлар билан бирга яшашга қай даражада мослашиши очиқ савол бўлиб қолмоқда.