Наманганда вилоят ҳокими Хайрулла Бозоровнинг хизмат автомобилига жарима солинди.
«Namanganliklar» Telegram-каналида маълум қилинишича, жорий йилнинг 6 февралида Тўрақўрғон туманида давлат рақами “50 050 AAA” бўлган Toyota Prado машинаси ҳайдовчиси йўл ҳаракати хавфсизлиги қоидасини бузиб, тезлик 70 км/соат билан чегараланган жойда 81 км/соат тезлик билан ҳаракатланган.
Тезлик меъёрдан оширилганини фоторадар қайд қилган.
Шу сабабли Ўзбекистон Республикаси МЖтК 128(3)-моддасининг биринчи қисмига асосан вилоят маъмурияти томонидан 223 минг сўм жарима тўланган.
Таъкидланишича, вилоят ҳокимлиги ишлар бошқармаси томонидан ҳокимлик транспорт воситалари ҳайдовчилари билан тушунтириш ишлари ўтказилган, бундан кейинги фаолиятда йўл ҳаракати қоидаларига тўла амал қилиш борасида қатъий кўрсатма берилган.
