Урганчда коронавирусга қарши махсус тактика машқлари ўтказилди

Хоразм вилояти маркази Урганч шаҳридаги халқаро аэропортда янги турдаги коронавирус инфекциясининг вилоят ҳудудига кириб келиши ва тарқалишининг олдини олишга қаратилган кўргазмали махсус тактика ўқув машқлари ўтказилди.

Бу ҳақда Хоразм вилояти Фавқулодда Вазиятлар бошқармаси (ФВБ) хабар беради.

Машқларда ФВБ, ИИБ, Божхона бошқармаси, Чегара қўшинлари, Ўзбекистон миллий гвардияси Хоразм вилояти бошқармаси, Санитария эпидемиология осойишталик маркази, Давлат чегараси ва транспортдаги ветеринария назорат бошқармаси, ҳамда Фавкулодда вазиятлар давлат қуйи тизими хизматларининг бундай воқеа-ҳодисаларга қай даражада шайлиги кўздан кечирилди.

Машқлар якунида коронавирус ҳақида тушунча, карантин ва ўта хавфли юқумли касалликларнинг четдан кириб келиши, эпидемияга қарши чора-тадбирлар ва уларнинг профилактикаси каби мавзуларда давра суҳбати ўтказилди.

Тайёрлаган Сардор Юсупов

#Хоразм #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.