Помпео энергетика хавфсизлиги учун Шарқий Европага 1 млрд доллар ажратилишини ваъда қилди

АҚШ давлат котиби Майк Помпео Мюнхендаги хавфсизлик бўйича конференцияда чиқиши чоғида АҚШ «Уч денгиз ташаббуси»га кирувчи Марказий ва Шарқий Европа давлатларига 1 млрд доллар ажратишини маълум қилди. Бу ҳақда AFP хабар бермоқда.

«Уч денгиз ташаббуси» — 2016 йилда Адриатика, Болтиқ ва Қора денгиз орасида жойлашган давлатлар имзолаган ҳамкорлик тўғрисидаги битим. Австрия, Чехия, Словакия, Хорватия, Венгрия, Словения, Руминия, Болгария, Польша, Литва, Латвия ва Эстония ушбу битим қатнашчилари ҳисобланади. 

Помпеонинг сўзларига кўра, маблағ Халқаро тараққиёт бўйича молиявий корпорация орқали ажратилади. Вашингтон ушбу ёрдам орқали мамлакатларнинг энергетика тизимини ривожлантириб, уларнинг Россия энергетикасига қарамлигини камайтирмоқчи.

У шунингдек, АҚШ «Шимолий оқим-2» қувури ўтказилишига қарши эканлигини яна бир бор таъкидлади.

Ўтган йил декабрда АҚШ президенти Дональд Трамп «Шимолий оқим-2» қурилишида ишлаётган компанияларга нисбатан санкциялар киритиш кўзда тутилган мудофаа бюджетини имзолаганди. Шундан сўнг газ қувури ётқизишда иштирок этаётган Швейцариянинг Allseas компанияси ишларни тўхтатганини маълум қилди. Натижада газ қувурини ётқизишни якунлаш муддати ортга сурилди.