АҚШ Ўзбекистонга коронавирусга қарши кураш учун 600 дона шахсий ҳимоя воситалари тўплами берди

АҚШ ҳукумати Ўзбекистонга мамлакатнинг коронавирусга қарши курашдаги саъй-ҳаракатларини қўллаб-қувватлаш мақсадида 600 дона шахсий ҳимоя воситалари тўпламини топширди.

Фото: АҚШнинг Тошкентдаги элчихонаси

АҚШ элчихонаси сайтида маълум қилинишича, 20 февралда АҚШнинг Тошкентдаги элчихонаси ходимлари Ўзбекистон Республикаси Соғлиқни сақлаш вазирлигининг Республика ўлат, карантин ва ўта хавфли юқумли касалликлар муҳофазаси марказига тўпламларни етказиб беришган.

Элчихона маълумотларига кўра, январда Ўзбекистон Республикаси Соғлиқни сақлаш вазирлиги барча халқаро донорларга шахсий ҳимоя воситалари ва коронавирус диагностикаси учун тест-тўпламлар етказиб бериш илтимоси билан мурожаат қилган.

Бу мурожаатга жавобан АҚШнинг Мудофаа хавфини камайтириш агентлиги (DTRA) 600 дона шахсий ҳимоя воситалари тўплами, жумладан юз учун ниқоблар, комбинезонлар, пластик ниқоблар, респираторлар ва қўлқоплар харид қилиш учун маблағ ажратган.

Тайёрлаган Шуҳрат Раҳимов

#АҚШ #Ўзбекистон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.