Анқара ва Москва Идлибда тарангликни пасайтириш борасида келишиб олди

Туркия пойтахти Анқарада Сурия бўйича Россия ва Туркия маслаҳатлашувининг навбатдаги босқичи ўтказилди. Россия ТИВ расмий баёнотида ҳар икки томон тарангликни пасайтириш ва террорчилар билан курашиш мақсад қилиб олинганини тасдиқлагани айтилмоқда.

26-28 февраль кунлари бўлиб ўтган музокараларда РФ президентининг Сурия масаласи бўйича махсус вакили А.Лаврентьев, РФ ТИВ раҳбарининг ўринбосари С.Вершенин ва Туркия ТИВ раҳбари ўринбосари С.Ўнал қатнашган.

Россия ТИВ ўз баёнотида музокаралар чоғида Идлиб эскалациядан халос бўлиш зонасидаги вазиятни барқарорлаштиришга эришиш йўлида 2017 йил 4 майдаги ҳамда 2018 йил 17 сентябрдаги меморандумларнинг тўлиқ бажарилишини таъминлаш асосида конкрет қадамлар муҳокама қилинганини таъкидлаган.

«Ҳар икки тараф БМТ Хавфсизлик Кенгаши томонидан террорчи деб тан олинганларга қарши курашда «ер устида» тарангликни пасайтириш, шунингдек, эскалациядан халос бўлиш зонаси ичидаги ва ташқарисидаги фуқаролардан иборат аҳолини ҳимоя қилиш ва барча эҳтиёжмандларга шошилинч инсонпарварлик ёрдами кўрсатишга бўлган мақсадларни тасдиқлади», деб таъкидланади Россия ТИВ баёнотида.